Канжар Кадыралиев Интерпол аркылуу изделет, ал эми жактоочусу анын Ошто экендигин айтты

© Sputnik / Евгений Биятов / Медиабанкка өтүүЗаседание суда по "болотному делу"
Заседание суда по болотному делу - Sputnik Кыргызстан
Жазылуу
Ош облустук ички иштер башкармалыгы Канжар Кадыралиев эл аралык алкакта издөөдө экендигин, издөө боюнча маалыматтар Интерполго бүгүн түшкөндүгүн тастыктады. Ал эми экинчи тарап бул тууралуу маалыматы жоктугун айтышты.

БИШКЕК, 16-дек — Sputnik. Депутат Ыргал Кадыралиеванын бир тууганы Канжар Кадыралиев Интерполдун алкагында издөөгө алынды. Бул туурасында Ош облустук ички иштер башкармалыгынын маалымат кызматынын жетекчиси Жеңиш Ашырбаев Sputnik сайтына билдирди. Ал эми анын жактоочусу Байыш Жоробеков Канжар Кадыралиевдин Ошто эле жүргөндүгүн билдирди.

"Канжар Кадыралиевге издөө салуу боюнча Ош облустук ички иштер башкармалыгы Интерполго материалдарды 13-декабрда ИИМ аркылуу жибергенбиз, ал Интерполго бүгүн түштү", — деп билдирди Ош ОИИБ маалымат кызматынын жетекчиси Ашырбаев.

Ашырбаев издөөгө алынган Канжар Кадыралиевдин расмий түрдө республикадан чыгып кеткендиги боюнча фактылар жоктугун, бирок өлкө аймагында болбошу да мүмкүн деген күмөн саноо жаралып жаткандыгын айтты.

"Бүгүнкү күндө башка республикалар менен чек араларыбыз толук жабылбагандыктан, авто-унаа менен эмес, жөө өтүп кетиши да мүмкүн деген шектенүүлөр бар. Жабырлануучулардын "Кыргызстанда эле жүрөт" деген маанайдагы арыздарын текшергенде, авто-унаада жүргөн ал эмес, Канжардын бир тууган иниси болуп чыкты. Акыркы маалыматтарга таянсак, издөө жарыялангандан эки күндөн кийин жабырлануучуларга телефон чалып, кечирим сураган экен. Бирок ал телефону азыр бүгүнкү күндө иштебей турат. Жашаган жери менен болжолдуу туугандарыныкынан издеп, ыкчам топтор, тиешелүү кызматкерлер иш жүргүзүүдө. Интерполго бергенибиз да издөө боюнча ар тараптуу иш-чараларыбыздын бири", — деди Ашырбаев.

Ош ШИИБ өкүлү Кадыралиев менен бирге анын ишине байланыштуу дагы бир жаран изделип жаткандыгын кошумчалады. 

Ал эми жактоочусу Байыш Жоробеков Канжар Кадыралиевдин эч жакка кетпей, Ошто жүргөндүгүн, тергөөгө келип сурак бербегендигинин себептерин айтты.

"Азыр Интерпол аркылуу издөөгө алынгандыгы боюнча маалыматым жок, бирок республикада издөөдө экендигин билем. Буга Бекташов Абдимиталдын арызы боюнча кылмыш иши козголуп, айыбы сырттан угузулуп, соттон камакка алуу боюнча санкция берилген. Азыр тергөөгө бара элек. Канжардын үстүнөн Сактан Келдибаевдин түшкөн арызы боюнча да сурак берип, эч жакка качкан эмес. Азыр жасалган каракчылык боюнча ушул да бар болсо керек деген таризде айтылып жатат. Ошол иштин бети ачылса жакшы болмок деп, ал ачылмайынча тергөөгө барбай турат. Канжар азыр Ошто жүрөт", — дейт жактоочу Байыш Жоробеков.

Ош шаардык прокуратурасынын мурдагы кызматкери, ЖК депутаты Ыргал Кадыралиеванын агасы Канжар Кадыралиевге опузалап акча талап кылуу жана ур-токмокко алуу иштери боюнча айып тагылган. Ал тергөө органдарынын суракка келүү боюнча чакырууларына жооп берген эмес. Ош обул соту 18-ноябрда Канжар Кадыралиевге карата сыртынан өкүм чыгарып, анын баш коргоо чарасын камакка алууга алмаштырган.

Жаңылыктар түрмөгү
0