Чек арачылар күчөтүлгөн тартипте иштөөсүн улантууда. Акыркы маалымат

© AP Photo / Vladimir VoroninКыргыз аскер кызматкери. Архив
Кыргыз аскер кызматкери. Архив - Sputnik Кыргызстан, 1920, 03.05.2021
Жазылуу
УКМКнын Чек ара кызматынын бөлүмдөрү күчөтүлгөн тартипте иштеп жатышат. Соңку түнү эч кандай чатак, ок атуу катталган эмес.
БИШКЕК, 3-май. — Sputnik. УКМКнын Чек ара кызматынын маалымат бөлүмү 3-майда саат 9.30га карата кыргыз-тажик чек арасындагы абал туруктуу экенин билдирет. Соңку түнү эч кандай чатак, ок атуу катталган эмес.
"Кыргыз-тажик чек ара тилкеси чек арачылардын көзөмөлүндө. Тараптар бардык кошумча күчтөрдү жана каражаттарды чек арага жакын жерден алып кетишкен. Эки тараптын коргонуу мекемелеринен түзүлгөн биргелешкен комиссия кошумча күчтөр турган аймактарды кароо ишин улантууда", — деп айтылат маалыматта.
УКМКнын Чек ара кызматынын бөлүмдөрү күчөтүлгөн тартипте иштеп жатышат.
Баткендеги кандуу кагылыш
Адам өлүмүнө алып келген Баткендеги кандуу кагылышуу 28-апрель күнү кечинде башталып, ок атылып, калаба 2-3 күнгө созулуп кетти. Натыйжада 34 кыргызстандык жаран көз жумуп, 200гө чукул киши октон, таштан жаракат алып ооруканага түштү. Он миңдеген адам эвакуацияланып, жанын арачалап, турак жайын таштап кетүүгө аргасыз болду. Баткен менен Лейлек райондорунун чек арага жакын жайгашкан айылдары өрттөнүп, үйлөр, социалдык объектилер бүлгүнгө учурады.
Последствия военного конфликта в приграничном селе Максат - Sputnik Кыргызстан, 1920, 02.05.2021
Чек ара чырында талкаланган үйлөр мамлекеттин эсебинен калыбына келтирилет
1-майдан тарта эки тараптуу сүйлөшүүлөрдөн кийин абал турукташа баштап, чек ара тилкесине тартылган аскер техникасы, күч түзүмдөрү чыгарылды. Ушу тапта аймакта кырдаал тынч, тургундар айылга кайтып, КР бийлиги келтирилген зыяндын көлөмүн эсептеп жатат. Үй-жайсыз калгандарды там-таш менен камсыздоо милдети өкмөттүн мойнунда.
Ал эми Тажикстандын бийлиги тараткан маалымат боюнча кагылышуудан 16 киши набыт болгон.
Азыркы маалда Баткенде абал кандай болуп жатканын Sputnik Кыргызстан агенттиги жүргүзүп жаткан тексттик трансляциядан билүүгө болот.
Жаңылыктар түрмөгү
0