21:00 11 Чын Куран 2021
Түз эфир
  • USD84.7863
  • EUR100.7855
  • RUB1.0988
Окуялар
Кыскача шилтеме алуу
Бишкекте 27 жаштагы кыздын уурдалып, өлтүрүлүшү (42)
0 0

Күбөлөрдүн милицияга берген маалыматы боюнча, 5-апрель күнү саат 19:00дөр чамасында кыз апасы менен телефон аркылуу сүйлөшүп "сарсанаа болбогула, үйгө барам" деген.

БИШКЕК, 8-апр. — Sputnik. Бишкек ШИИБдин маалымат кызматы Бишкектен уурдалып, кийин киши колдуу болгон кыздын окуясы боюнча жаңы жагдайларды айтты.

Тергөөнүн жүрүшүндө күч органдары Honda Civic үлгүсүндөгү автоунаанын ээсин аныкташкан. Унаа ээси Н.К. аттуу Кара-Балта шаарынын тургуну машинаны К.Д. аттуу адамга ижарага бергенин билдирген. Ал эми К.Д. аттуу киши Honda Civic үлгүсүндөгү автоунаа менен анын Т.З. аттуу улуу агасы иштээрин айткан.

"Дал ошол автоунаа менен 36 жаштагы Т.З. аттуу адам тааныштары менен К.А. аттуу 27 жаштагы кызды ала качып белгисиз тарапка кетишкен", — деп жазылат билдирмеде.

Кызды ала качкан 5-апрель күнү милиция кызматкерлерине Honda Civic үлгүсүндөгү автоунаанын Ак-Өргө жаңы конушунан батыш тарапты көздөй багыт алгандыгы тууралуу маалымат түшкөнү айтылды. Буга байланыштуу Сосновка айылындагы постуна кошумча милиция коюлган.

Күбөлөрдүн милицияга берген маалыматы боюнча, 5-апрель күнү саат 19:00дөр чамасында апасы менен телефон аркылуу сүйлөшкөн Айзада "сарсанаа болбогула, үйгө барам" деп жооп берген. 6-апрелге караган түнү болжол менен 2:00дө кыздын апасы милиция кызматкерлерине чалып, кызы үйгө келбегенин кабарлаган. Кыздын телефону апасы менен сүйлөшкөндөн кийин эле өчүп калганы аныкталган.

"Т.З. аттуу адам 27 жаштагы К.А. аттуу кыз менен төрт айдан бери тааныш экени маалым болду. Ал автоунаа менен кызга келип жүргөн. Күбөлөрдүн айтымында, 36 жаштагы Т.З. тааныштарына өлтүрүлгөн кыз тууралуу көп айтып, ага үйлөнөрүн да билдирген", — деп жазылат маалыматта.

Бишкектен уурдалган кыздын өлүмү

Эске салсак, 5-апрель күнү эртең менен саат 7:30дар чамасында Медеров жана Тыныстанов көчөлөрүнүн кесилишинен үч бала 27 жаштагы кызды кызыл түстөгү унаага салып кеткен. Бул учур ошол жердеги кафенин видео байкоосуна тартылып калган. Милиция тарабынан изделип жаткан автоунаа 7-апрелде Чүйдөгү Арашан менен Чокморов айылдарынын ортосунан табылган.

Жергиликтүү чабан автоунааны 5-6-апрель күндөрү эле көргөнүн айтып, бирок маани бербегенин билдирген. Ал 7-апрелде гана автоунаанын жанына барып, салондун ичинен эки адамдын сөөгүн көрүп дароо милицияга чалган. Милициянын алдын ала божомолу боюнча, 36 жаштагы киши уруш-талаштан кийин кызды муунтуп, андан кийин өзүн бычактап, өмүрүн кыйган.

Милициянын ыкчам-тергөө тобу тарабынан кызды ала качууга катыштыгы бар деген адамдар изделип, жыйынтыгында 29 жаштагы Р.А. аттуу шектүү кармалган. Ал Тергөө кызматына жеткирилип, Жазык-процесстик кодексинин 98-беренесинин негизинде Бишкек ШИИБдин убактылуу кармоочу жайына киргизилген.

Күч органдары учурда дагы эки шектүүнүн жүргөн жерин аныктап, кармоо боюнча ыкчам-издөө иш-аракеттери жүрүп жатканын билдирди.

Белгилей кетсек, кыздын туугандары аны 5-апрелде эле издеп башташкан. Биринчи май райондук милицияга арыз жазып, бирок издөө иштери кечеңдеп жатканына нааразы болушкан.

Тема:
Бишкекте 27 жаштагы кыздын уурдалып, өлтүрүлүшү (42)

Тема боюнча

Бишкектен кыз ала качууга катыштыгы бар делген шектүүнүн бири кармалды
Милиция Бишкекте ала качып кетти деген кызды эки күндөн бери издеп жатат
Бишкектен ала качып кетти деген кыз менен шектүү кишинин сөөгү табылды
Белгилер:
кыз, өлүм, милиция, кыз ала качуу, Бишкек, Кыргызстан

ЭҢ МААНИЛҮҮ