20:09 09 Теке 2020
Түз эфир
  • USD77.7979
  • EUR88.1334
  • RUB1.0976
Окуялар
Кыскача шилтеме алуу
132 0 0

Узап кеткен айда өлкө аймагындагы фемида өкүлдөрү адам өмүрүнө кол салган бир топ кылмыш иштерин карады. Анын арасында аталаш тууганын өлтүргөн жигиттин, өспүрүмдү бычактаган кошунанын былыктары бар.

Sputnik Кыргызстан агенттиги май айында чыккан чуулуу соттук иштердин айрымдарын сунуштайт.

Тууганын киши колдуу кылган

34 жаштагы айыпталуучу достору менен козу союп, куурдак жасап үйдө арак ичип майрамдашкан. Дасторкондо тамак ичип отурган маалда үй ээси менен тууганынын ортосунда уруш чыгып, экөө жулкулдашкан боюнча сыртка чыгып кетет. Мушташып жатып бири экинчисин бычактап, ал ошол жерден көз жумган. Сот беш баланын атасын 12,5 жылга темир тор артында калтырып, 110 миң сом айып пул салды.

Өспүрүмдү бычактаган кошуна

Дарбазасына таш тийгенине жини келип, уй кайтарып жүргөн балдардын бирин кармап алып бычак шилтеген кишини сот алты айга эркинен ажыратты. Жабырлануучу жашы жете элек өспүрүм экени айтылды. Балдар уй айдап келе жатышкан. Үй ээси дарбазасына таш тийгенден кийин балдарды кубалап, бирөөсүн кармап алып чөнтөгүнө сала чыккан бычагы менен моюнга сайып жиберген. Жабырлануучу аймактык ооруканага жеткирилип аман калган. Тергөө маалында колго түшкөн кошуна кылганын жарым-жартылай мойнуна алып, мындай кадамга өспүрүмдөрдү коркутуп коюу үчүн гана барганын айткан. Эми алты ай абакта болмокчу.

Соттолгон кайнене

Ош облусундагы айылдардын биринде 49 жаштагы аял келинине кол көтөргөн. Жаш келин маркум кайнатасына куран окутканы айылга барып, кайненеси менен уруша кеткен. Ошондо жесир аял келинин "үйдөн чыгып кет" деп жулмалап дубал сүздүрүп, ден соолугуна зыян келтирген. Айыпталуучу ага карата кол көтөрбөгөндүгүн жана жөн гана "сен 15 жылдан бери келбей, эми эмне келип калдың" деп кайрылгандыгын айткан. Сот мурда-кийин соттолбогон беш баланын энесин 50 саатка коомдук жумушка тартуу чечимин кабыл алды.

Айылдашын айры менен сайып жиберген

Ысык-Көл облусунун кымызкана иштеткен 45 жаштагы тургуну айылдашын айры менен сайып жиберип беш жылга кесилип кетти. Жабыркаган жаран шериги менен кымыз ичкени келип, эс алуучу жайдын ээси менен уруша кеткен. Ал мас болгон кардарлардын бирин ичке сайып жиберген.

Сотто айыпталуучу өлтүрүүгө аракет кылбагандыгын айтып, айры кокусунан сайылып кеткендигин билдирген.

"Кымыз ичкени келгендердин арак ала келгенин көргөм. Бир маалда экөө мас болуп кардарларга тийише баштаганда кетип калгыла дегем. Ошондо бирөөсү менен уруша кетип, аны бир жолу чаап жибергем. Ал жыгылып, бир аздан кийин туруп кетип калган. Жанындагы шериги мени бир муштап калууга жетишкен. Мен жыгылып, алым жетпей турганын билип, айры менен коркута баштагам. Кандай болуп кеткенин билбейм, бир маалда карасам айры сайылып калыптыр. Бул окуя этиятсыздыктан болду, кылган ишиме өкүнөм жана жеңил жаза берүүңүздү өтүнөм", — деп көрсөтмө берген.

Жабырлануучу райондук ооруканага жеткирилип аман калган. Ал эми 45 жаштагы ишкер беш жыл бою камакта болот.

Чет элдикти алдаган шылуун

Сот жоопкерчилигине тартылган адам кытайлык жарандан 100 миң доллар акча алып, жогорку кызматтагы аткаминерлер менен тааныштырып, көйгөйлүү маселесин чечүүгө көмөктөшмөк болот. Бирок ал ири суммадагы акчаны алып таптырбай кеткен. Сот ал шылуунду үч жылга шарттуу кесип, бир жылдын ичинде жабырлануучуга алты миллион 865 миң сомду кайтарып берүүгө милдеттендирди.

Бычакташкан достор

30 жаштагы эркек жеке күзөт фирмада иштеген досу менен түн ортосунда кардарлар таштап кеткен тыйынды бөлүшө албай мушташа кетип, шеригине бир нече жолу бычак сайып, ден соолугуна оор зыян келтирген. Бактыга жараша, бычакталган жигит ооруканага жеткирилип аман калган. Териштирүүдө шектүү күнөөсүн толугу менен мойнуна алып, соттон кечирим сураган. Ал эми жабыр тарткан тарап доосу жок экенин билдирген. Сот аны үч жылга эркинен ажыратып, 110 миң сомду мамлекетке төлөмөр кылды.

Тема боюнча

Бир үй-бүлөнүн өмүрүн алган киши 2,5 жылга кесилди. Соттук чечимдер
Белгилер:
айыпталуучу, өкүм, кылмыш, сот, Кыргызстан

ЭҢ МААНИЛҮҮ