БИШКЕК, 8-дек. — Sputnik. Бүгүн эртең менен Оренбург жана Акбулак (Россия) жолунун кесилишинде кыргызстандыктардын катышуусунда жол кырсыгы катталды. Маалыматты Россиядагы Кыргызстандын элчилигинен тастыкташты.
Ага ылайык, Казакстан менен чектеш Соль-Илецк шаарынын аймагындагы Казань — Оренбург — Акбулак жолунун 86-чакырымында минивэн Mercedes менен Ford Transit үлгүсүндөгү унаалар кагылышкан. Төрт киши көз жумуп, дагы төртөө ооруканага жеткирилген. Учурда каза болгондордун арасында кыргызстандыктардын бары-жогу такталууда.
Аталган факты боюнча Оренбургдагы ардактуу консул иш алып барып жатат. Кыргыз диаспорасы жабыркагандардын туугандарын издөөдө.
