10:37 14 Тогуздун айы 2019
Түз эфир
  • USD69.8106
  • EUR76.8580
  • RUB1.0870
Кара куурай. Архив

Жалал-Абадда АКШнын Тынчтык корпусунун ыктыярчылары баңгизат менен кармалышты

© Sputnik / Олег Ласточкин
Окуялар
Кыскача шилтеме алуу
236 0 0

Тынчтык корпусу Кыргызстанда 1993-жылдан бери иштеп келет. Бул убакыт аралыгында өлкөгө англис тили мугалими болуп иштеп кеткен ыктыярчылардын саны миңге чукулдады. Учурда өлкөнүн ар кыл облустарында уюмдун 70ке жакын ыктыярчысы эмгектенүүдө.

БИШКЕК, 27-сен. — Sputnik. Жалал-Абадда АКШнын Тынчтык корпусунун ыктыярчылары бир килограмм баңгизат менен кармалышканын облустук милициянын маалымат кызматы тастыктап, окуянын чоо-жайын айтып берди.

Такси менен бараткан ыктыярчылар 19-сентябрь күнү колго түшүрүлгөн.

"Облустук милициянын кызматкерлери Бишкек — Ош жолунда Honda Odyssey унаасын токтоткон. Машинада АКШнын көз карандысыз федералдык Тынчтык корпусу агенттигинин ыктыярчылары, Американын эки жараны болгон. Милиционерлерге эркектер шектүү көрүнүп, унааны карап чыгууну чечишкен. Текшерүү учурунда арткы орундукта отурган жүргүнчүлөрдүн жанынан 1 килограмм 26 грамм көлөмүндөгү кара куурайга окшош жашыл зат табылган", — деп айтылат маалыматта.

Ыкчам тергөө иш-чараларынан кийин чет элдиктерден алынган зат соттук-химиялык экспертизага жиберилип, кара куурай экени аныкталган.

Шектүү катары кармалгандардын бири өз көрсөтмөсүндө күнөөнү моюнуна алып, баңгизат ага тиешелүү экенин айткан. Ал Токтогул райондук сотунун чечими менен Жалал-Абаддын тергөө абагына эки айга камакка алынган.

Ал эми экинчиси бошотулган.

Белгилей кетсек, Тынчтык корпусу Кыргызстанда 1993-жылдан бери иштеп келет. Бул убакыт аралыгында өлкөгө англис тили мугалими болуп иштеп кеткен ыктыярчылардын саны миңге чукулдады. Учурда өлкөнүн ар кыл облустарында уюмдун 70ке жакын ыктыярчысы эмгектенүүдө.

Кармалган ыктыярчы Жалал-Абад облусунун Аксы районундагы орто мектептердин биринде англис тилин окутуп келген.

Кызыктуу жана маанилүү жаңылыктарды алгачкылардан болуп билгиңиз келеби?
Биздин Telegram-каналга жазылыңыз.

Тема боюнча

Чүйдө үч тонна кара куурай өрттөлүп жок кылынды. Сүрөт
Белгилер:
баңгизат, кара куурай, ыктыярчылар, Жалал-Абад

ЭҢ МААНИЛҮҮ