ОШ, 1-апр. — Sputnik. Ош облусунун Кара-Суу районундагы Шарк айыл өкмөтүнө караштуу Маданият айылынын 47 жаштагы тургуну 48 жаштагы бир тууган агасын балта менен башка бир нече жолу чаап өлтүрдү деген шек менен кармалды. Бул тууралуу облустук милициянын маалымат катчысы Жеңиш Аширбаев билдирди.
Кылмышка шектүү катары маркумдун бир тууган иниси кармалып, убактылуу кармоочу жайга киргизилген. Ага карата кылмыш иши козголуп, учурда тиешелүү экспертизалар дайындалды.
Шектүү агасын балта менен уруп өлтүргөнүн мойнуна алган. Учурда анын эмне себептен мындай кадамга баргандыгы териштирилип жатат.
"Иликтөөлөр көрсөткөндөй, шектүү жакында Россиядан келген. Ал көп ичкендиктен байкеси арак ичпөөнү өтүнгөндө чыр чыккан. Шектүүнүн үй-бүлөсү болгон эмес", — деди Аширбаев.
Маркумдун артында 1 уулу менен 1 кызы калды.
