БИШКЕК, 21-авг. — Sputnik. Борбор калаадагы Октябрь РИИБинин кызматкерлери Көк-Жар конушунун жашоочусун тоноого даярданып жаткан делген төрт адамды колго түшүрдү. Бул тууралуу Бишкек шаардык ички иштер башкармалыгынын маалымат кызматынан кабарлашты.
Билдирүүгө ылайык, жаран белгисиз адамдар бир нече күндөн бери анын үйүнө көз салып жүргөндөргө каршы чара көрүүнү өтүнүп милицияга кайрылган.
"Октябрь РИИБинин Криминалдык милиция кызматынын өкүлдөрү шектүүлөрдүн автоунаасын аныктаган. Анын негизинде 28 жаштагы Өзбекстандын жаранын колго түшүрүшкөн. Шектүүнүн жанынан тапанча менен бычак табылган", — деп жазылат маалыматта.
Анын көрсөтмөсүнүн негизинде укук коргоочулар Чүй облусунун Ысык-Ата районунда жашынып жүргөн шериктерин колго түшүргөн. Ошол маалда шектүүлөр катуу каршылык көрсөтүп, бир милиционер бычак жеген. Ага медициналык жардам көрсөтүлүп, абалы туруктуу.
Шектүүлөр Бишкек шаарында жашаган 31 жаштагы Р.Б, 40 жаштагы К.М жана 26 жаштагы Н.К аттуу адамдар.
Шектүүлөр кармалган соң, алардын биринин ата-энеси баласына милиция кызматкерлери күч колдонгондуктан, баш мээси чайкалып ооруканада жатканын айтып арыз жазышкан. Учурда бул боюнча шаардык милициянын ички тергөө кызматы иликтөө жүргүзүүдө.
