Бишкекте эки троллейбус кагышты. Жеринен алынган сүрөттөр

БИШКЕК, 18-июл. — Sputnik. Борбор калаада эки троллейбус кагышты. Бул тууралуу Sputnik Кыргызстан агенттигинин кабарчысы жеринен билдирди.

Анын айтымында, жол кырсыгы бүгүн, 18-июлда болжол менен эртең мененки саат 8:20да, 10-кичи райондогу Абдрахманов көчөсүндө катталган.

Троллейбустун айдоочусу кабарчыга унаанын тормозу иштебей калганын айткан. Алдын ала маалыматтар боюнча жабыркаган адамдар жок. 

Бул боюнча Жол кыймылы коопсуздугун камсыздоо башкы башкармалыгына жана Тез жардам борборуна эч кандай чалуулар түшкөн эмес.

Бишкек троллейбус башкармалыгы айдоочулардын бири токтоордо аралыкты сактабагандыктан кагышуу болгонун маалымдады.

Унаалар учурда станцияда, жол кырсыгынын себептери такталууда.