14:14 24 Бугу 2019
Түз эфир
  • USD69.8492
  • EUR77.8085
  • RUB1.0831
Бүркүт. Архивдик сүрөт

Фестивалда бүркүт кол салган кыздын абалы жана окуянын чоо-жайы

© Sputnik / Табылды Кадырбеков
Окуялар
Кыскача шилтеме алуу
103010

Бүркүттү коё бергенде 10 жаштагы кыз оюн талаасына чуркап чыга калганы айтылды.

БИШКЕК, 16-июл. — Sputnik. Ысык-Көлдөгү этнофестивалда бүркүт кол салган кыздын саламаттыгы жайында. Бул туурасында Sputnik Кыргызстан агенттигине анын эжеси Назира Акылбекова билдирди.

Эскерте кетсек, кечээ, 15-июлда Тоң районунда өтүп жаткан "Тескей жээк" этнофестивалындагы салбуурун учурунда бүркүт кызга кол салган.

Жабыркаган кыз Азиза Карыйбекова 10 жашта. Ал фестивалда уюштуруучулардын катарында иштеп жаткан эжесинин жанында жүргөн.

"Сиңдим байкабай бүркүт коё берилчү талаага кирип кетиптир. Бул жерде күнөө биз тараптан кетип калды. Кыздын абалы жакшы, башын төрт жеринен тигишти. Бүркүттүн тырмагы бир аз кирген экен. Анан далысы кичине сыйрылган. Учурда үйдө, жакшы эле басып жүрөт. Коркуп калган, дем салдырып жатабыз. Өзүм ошол жерде иштеп келгендерди каттап жаткам. Азиза жанымда мага каралашып турган эле", — деди Акылбекова.

Бүркүттүн ээси Салават Айбек уулунун айтымында, куштун мындай адаты болгон эмес. Бүркүттүн аты Чагылган, 15 жашта. Буга чейин көптөгөн салбуурунга катышып, II Дүйнөлүк көчмөндөр оюндарында биринчи орунду уткан.

"Мелдеш башталып, мен бүркүттү тосуп алуу үчүн ары жакка тургам, бери жактан коё беришкенде кыз оюн талаасына чуркап чыга калды. Ошондо бүркүт анын үстүнө конуу керек деп ойлоп алган. Эгер кол салуу максаты болгондо катуу чапчып коё бербей коймок. Өзүм 10 жылдан бери мүнүшкөрлүк менен алектенем. Үйдө мындан башка дагы бир үч жаштагы бүркүтүм бар. Экөөнүн тең аты Чагылган", — деди мүнүшкөр.

Белгилей кетсек, Айбек уулунун үч жаштагы бүркүтү буга чейин Бишкектеги Hyatt Regency мейманканасында өтүп жаткан шоу-программа учурунда асманга учуп кеткен бойдон жоголуп, эки күндөн кийин табылган

Салбуурун федерациясынын президенти Алмаз Акунов бул окуяны кокустук катары кабылдоо керектигин белгиледи.

"Бүркүт салуу мелдештерин 15 жылдан бери өткөрүп келе жатабыз. Биздин тарыхыбызда мындай окуя биринчи жолу болду. Куш келе жатканда кыз илип кетет деп коркуп чыңырып, көмкөрөсүнөн жатып алыптыр. Байкасаңыздар, бүркүт жандыктарды алганда тээп анан чапчыйт. Коё бербейт, араң чыгарасың. Бул жерде кокустук гана болду. Бирок, аябай сарсанаа болуп, фестивалдан кийин балдарга чогулуш өткөрүп "Бүркүттү чаап койдуңар беле, таарынттыңар беле?" деп сурасам андай болбогонун билдиришти. Куштун өзүн текшерсек да жакшы эле чыкты. Оюн талаасынын чекеси тасма менен тосулган болчу. Ал жакка кирүүгө тыюу салынат. Микрофон менен да "балдарды алыс алгыла" деп эскертип турабыз", — деди Акунов.

Бүркүт салуу, далба ойнотуу, тайган жарыш оюндарын камтыган Салбуурундун эрежеси менен Sputnik Кыргызстан агенттиги даярдаган материалдан таанышыңыздар.

Тема боюнча

Чочуп калыптыр. Бишкектин чок ортосунан жоголгон бүркүт табылды
Ысык-Көлдө этнофестиваль учурунда бүркүт кызга кол салды
Белгилер:
салбуурун, кыздар, этнофестиваль, бүркүт

ЭҢ МААНИЛҮҮ