БИШКЕК, 13-май — Sputnik. Бишкектеги "Метропабка" белгисиз киши кирип келип, баллондогу газды элге чачкан. Бул тууралуу мекеменин администратору Sputnik Кыргызстан агенттигине билдирди.
Окуя 13-майда түнкү саат 1:20лар чамасында болгон.
"Кишилерди дароо сыртка чыгардык, кол салган киши качып кетти. Милицияга кайрылдык, эртең бардык материалдарды укук коргоо органдарына беребиз. Бул иш биздин атаандаштардын колунан келди деп жатабыз", — деди мекеменин өкүлү.
Бишкек ШИИБи бул тууралуу маалыматы жок экенин билдирди.
Социалдык тармакта окуя болгон жерден тартылган сүрөттөр жарыяланды.
