БИШКЕК, 7-ноя. — Sputnik. Бишкек ШИИБинин кызматкери пара алып жаткан жеринен кармалгандыгын ИИМдин маалымат кызматынан кабарлашты.
Билдирүүгө караганда, ИИМдин ички иликтөө кызматына Казакстандын эки жараны кайрылган. Алар Свердлов РИИБинин кызматкерлери Кыргызстандын аймагында мыйзамсыз жүргөндүгү боюнча ишти оңунан чечип берүү үчүн 29-октябрь күнү сегиз миң сом алганын билдиришти. Ошондой эле эми дагы 20 миң сом сурап жатканын кошумчалашкан.
Кечээ, дүйшөмбү күнү ыкчам иликтөө тобу тарабынан милициянын лейтенанты 14 миң сом алып жаткан жеринен колго түшүрүлдү.
Бул факты боюнча Башкы прокуратура Кылмыш жана жаза кодексинин 313-беренесинин бир нече бөлүгү менен (Пара алуу), (Пара талап кылуу) кылмыш ишин козгоду.
