БИШКЕК, 28-апр. — Sputnik. Ички иштер министрлигинин, күч түзүмдөрүнүн мурунку жана учурдагы кызматкерлери курал саткан деп шектелүүдө. Бул тууралу Башкы прокуратура билдирди.
Маалыматка ылайык, аскер прокуратурасы Мамлекеттик чек ара кызматынын аскер бөлүгүндөгү куралдардын сатылышы боюнча тергөөнү аяктап, иш Биринчи Май райондук сотуна жөнөтүлдү.
Тергөө учурунда 2014-2016-жылдары укук коргоо органдарында иштеген топ адам Чек ара кызматына караштуу аскер бөлүгүндө сакталган ок-дары, куралдарды уурдап, башка адамдарга сатканы аныкталган.
Аталган кылмыш иши боюнча ИИМдин учурдагы кызматкерлери, күч түзүмдөрүнүн мурунку жана учурдагы аскерлери, жөнөкөй жарандар болуп 13 адамга бир канча берене боюнча кине коюлууда.
Мындан сырткары, курал-жарактардын уурдалышына жол берген кызматчыларга карата тергөө уланууда.
