БИШКЕК, 24-мар. — Sputnik. ИИМдин Уюшкан кылмыштуулукка каршы башкы башкармалыгынын кызматкерлери ири көлөмдө курал-жарак жана жардыруучу заттар катылган гараждарды табышканын министрликтин маалымат кызматынан кабарлашты.
Билдирмеге караганда, милиция кызматкерлери курал-жарактар катылган беш гаражга ээлик кылат деп шектелген Бишкек шаарынын 55 жаштагы тургунун колго түшүрдү.
Гараждардын ичинен "Калашников", "Сайга" жана ар кандай үлгүдөгү куралдардын ок дарылары, жардыруучу заттар табылган.
Мындан тышкары, ал жерден унаалардын номурлары, курал алып жүрүүгө уруксат берген документтер жана аңчылык күбөлүктөрү алынган.
"Колго түшкөн жарандын айтымында, жогорудагы куралдардын көбү ага кылмыштуу топтун жетекчиси, маркум Алмамбет Анапияевден калган", — деп айтылат билдирүүдө.
Учурда аталган фактыга карата Кылмыш жаза кодексинин 241-беренеси боюнча кылмыш иши козголду.
