Өз кызын зордуктап жүргөн караколдук киши 20 жылга соттолду

БИШКЕК, 6-фев. — Sputnik. Каракол шаарында өз кызын бир нече жыл бою зордуктап жүргөн киши 20 жылга эркинен ажыратылганын КР Акыйкатчы аппарат билдирди.

Маалыматка караганда, милицияга кызынын зордукталып жүргөнү боюнча маалыматты Ак-Суу районунун Сары-Камыш айылынын 40 жаштагы тургуну, кыздын энеси билдирген. Учурда кыз 12 жашта.

"Ак-Суу райондук соту 25-январь күнү бардык фактыларды карап чыгып, кордолгон кыздын атасын КР Кылмыш жана жаза кодексинин 130-беренесинин (Сексуалдык мүнөздөгү зомбулук аракеттер) негизинде күнөөлүү деп таап, 20 жылга эркинен ажыратты", — деп айтылат билдирүүдө.

Андан кийин акыйкатчынын Ысык-Көл облусундагы ыйгарым укуктуу өкүлү, Социалдык коргоо кызматынын райондогу бөлүмүнүн башчысы, Ак-Суу районунун прокурорунун орун басары, Каракол милициясы жана Сары-Камыш айылынын тургундарынын катышуусу менен жыйын өтүп, анда баланын укуктары жана ата-эненин милдеттери тууралуу сөз болду.

Акыйкатчы институнунун өкүлү региондук өкүлчүлүктөрүнө жергиликтүү бийликтин ишмердүүлүгүн өз көзөмөлүнө алып, балдардын коопсуздугу жана жыныстык кол тийбестигин камсыздоо боюнча иштерге кол кабыш кылууну тапшырды.

Педофилдерге башка мамлекеттерде кандай жаза колдонуларын Sputnik Кыргызстан агенттиги даярдаган материалдан таанышсаңыз болот>>