ИИМ: 38 жаштагы атасы кыздарын бир нече жыл катары менен зордуктап жүргөн

БИШКЕК, 22-дек. — Sputnik. Кыздарын зордуктап келген ата тууралуу төбө чачты тик тургузган маалымат Акыйкатчы институтуна Жогорку Кеңештин комитетинен келип түшкөн. Ал канынан жаралган 12 жаштагы жана 7 жашар эки кызын зордуктап жүргөн. Бул туурасында аталган институттан кабарлашты.

Маалыматтарга караганда, бул окуя Чүй облусунун айылдарынын биринде болгон. ЖК комитетинин билдирүүсүнөн кийин 7-декабрда Акыйкатчы институтунун өкүлдөрү аталган аймакка барып, кичине кыздар атасы тарабынан сексуалдык ыдык көргөнүн аныктаган. Алар менен эки ата өткөн тууганы – эжеси кошо барган. 

Кылмышка шектүү убактылуу камалгандан кийин, балдар чоң энеси менен калган. Улуусу 7-класстагы эркек бала, кийинкиси 11 жаштагы жана 7 жаштагы кыздар экендиги маалым болгон. Учурда кыздардын улуусу 5-класста окуса, кичүүсү мектепке барбайт. 

Туугандарынын айтымында, үчөө бир энеден туулган. Энеси балдарды таштап кеткендиктен, алар чоң энесинин колунда калган. 

38 жаштагы атасына кылмыш иши козголду 

Ички иштер министрлигинен Sputnik Кыргызстан маалымат агенттигине бул окуя боюнча туугандарынан арыз келип түшөрү менен милиция иштеп баштаганын айтып беришти. 

"Шектүү киши 9-ноябрда Бишкек шаарындагы убактылуу кармоо жайына киргизилди. Ал 1978-жылы туулган киши экен. Учурда тергөө иштери жүрүп жатат. Ага Кылмыш Жаза кодексинин 133-беренеси менен кылмыш иши козголду", — деп билдирди ИИМ өкүлү Эрнис Осмонбаев. 

Омбудсмен өкүлдөрү барып, Социалдык өнүктүрүү башкармалыгы балдар менен сүйлөшкөн. 

"Алар кадимкидей кепке келгени менен, кичүүсү түнт жана көп учурда унчукпайт. Балдар чоң энеси менен жашайт. Бирок ал балдардын расмий камкорчусу эмес. Күнөөлөнгөн кишинин эки ата өткөн тууганы болгон аял балдарга мындан ары ыдык көрсөтүлбөсүн деген максатта багып алууга аракет кылган. Бирок чоң энеси аларды реабилитиация борборуна жайгаштырып, кыздар менен адистердин иштешине караманча каршы болгон", — деп айтылат маалыматта.

Омбудсмен институтунун кызматкерлери үй-бүлө менен балдарды коргоо боюнча аймактык кызматтын ишин канааттандырарлык эмес деп баалаган. Чоң эненин убактылуу камкорчу болгонун далилдеген жана кыздарды коргоо боюнча тиешелүү кагаздары жоктугун билдиришти.

"Психологдун сунушу айтылганы менен кыздарга психологиялык жана башка жардамдар көрсөтүлбөгөн. Социалдык өнүгүү башкармалыгынын жетекчисинин айтымында, бул окуяны билгени менен жакындары эч кимге айтышкан эмес", — дешти аталган институттан. 

Милициянын маалыматына караганда, иликтөө иштеринде кыздардын улуусунан зордуктоонун белгилери, бүтүп калган жаракаттын издери байкалган. 

Кыздар окуя туурасында чоңдордун билгенин айтышкан

Омбудсмендин маалымат кызматы үй-бүлө менен балдарды коргоо бөлүмүнүн кыздар менен сүйлөшкөн учурда алар зордуктоо болгондугун айтып беришкенин кабарлады. Кыздардын улуусу мындай айбанчылык бир нече ирет болгондугун жана ал туурасында чоң атасы менен чоң энеси да билгендигин айткан. 

"Алардын чоң атасы мындан үч жыл мурда каза болгондугун эске салсак, демек кыз үч жылдан бери зордукталып келген. Туулгандыгы тууралуу күбөлүгү жок болгондуктан, кыздардын кичүүсүнө социалдык жана медициналык кызмат көрсөтүлгөн эмес. Үй-бүлө мүчөлөрү зордукчулдан кыздарды коргоону ойлобой, кылмыш тууралуу жашырып, ал эми балдарды оокат жасатуу үчүн алып жүргөндөй сезим калтырат", — деп билдиришти Омбудсмендин маалымат кызматынан. 

ИИМден жети жашар кыз учурда Бишкектеги реабилитациялык борборго жайгаштырылганын билдиришти.