ОШ, 5-дек. — Sputnik. Ош шаарынын тургуну Иса Абдувалиев үйүн тоноп, өзүнө бычак саюуга аракет кылып, башка чаап качып кеткен ууруларды узатпай кармап келген кошунасы Кубан Төлөновго рахмат айтып, ыраазычылык билдирди. Бул тууралуу аймактык кабарчы маалымдады.
59 жаштагы Иса Абдувалиев окуя тууралуу төмөнкүлөрдү айтып берди:
"25-ноябрында түнкү саат экилерде Шакиров көчөсүндө жашаган уулумдун үйүнө барсам бет кап кийген колунда бычагы бар адам үйдү тоноп чыгып баратыптыр. Колундагы баштыгында мык сууругуч аспабы бар экен. Ал мага бычак саюуга аракет кылды. Экөөбүз кармашып атып, ал мени башка темир менен чаап качып кетти", — деди ал.
Жабырлануучу кошунасынын Кубан деген баласын чакырган.
Төлөнов ИИМдин атайын адистешкен күзөт башкы башкармалыгынын күзөт бөлүмүндө инспектор болуп иштей тургандыгын кабарлады.
"Уурунун артынан түшкөндө ал таксиге отуруп качты. Мен да анын артынан такси менен кууп, шаардык мончо тараптан унааны кысып токтоттум. Ал кошунанын үйүнөн уурдап качкан акча, алтын буюмдарды баштыкка салып бараткан экен", — деди Төлөнов.
Ош шаардык ИИБи 26-ноябрга караган түнү каракчылыкка шектүү адам кармалып, убактылуу кармоочу жайга киргизилгендигин кабарлаган. Ал 41 жаштагы жаран экендиги аныкталган.
Маалым болгондой, шектүү жаран соодагердин үйүнө кирип, 105 миң сом, 2 миң рубль, 1000 долларын карактап кеткен. Ал үй ээсин бычак менен коркутуп, темир менен урган.
Шектүүгө карата Кылмыш жаза кодексинин 168-беренеси менен кылмыш иши козголуп, тергөө иштери жүргүзүлүп жатат.
