БИШКЕК, 17-окт. — Sputnik. Өзүн Кыргызстандын президенти Алмазбек Атамбаевдин тууганы катары тааныштырып элди сызга отургузууга шектелген жаран кармалганын Бишкек шаардык ички иштер башкармалыгынан кабарлашты.
Билдирмеге караганда, Нарын облусунун 45 жаштагы тургуну кечээ күнү Бишкектеги батиринен кармалган.
"Буга чейин милицияга 51 жаштагы Бишкек шаарынын тургуну арыз менен кайрылган. Ал 2013-жылы белгисиз жаран өзүн президенттин жеке жардамчысы катары тааныштырып, жумушка орноштурууга сөз бергенин билдирген. Мындай кызматы үчүн ал аялдан жети миң доллар алып, ошону менен изин суутуп кеткен", — деп айтылат маалыматта.
"Ушундай эле арыз менен Бишкектин дагы бир тургуну кайрылган. Ал өзүн Турус деп атаган жаран президенттин өкүл баласы катары тааныштырып, 2012-жылы унаа сатууга жардам көрсөтөм деп 6500 долларлык унаасын алган бойдон изин суутканын айткан. Мындан тышкары 2011-2012-жыл аралыгында 40500 долларды алдап кеткен", — деп ырасталат маалыматта.
Учурда аталган факты боюнча кылмыш иши козголду. Кармалган жаран дагы ушундай төрт кылмышка шектелип ага карата дагы кылмыш ишин козгоо каралып жатат.
