БИШКЕК, 13-сен. — Sputnik. Айт намаз учурунда Эски аянтка келген жарандардын жанынан жети бычак, эки кастет, МР-8 үлгүсүндөгү тапанча жана бир ок табылганын шаардык милициянын маалымат кызматы билдирди.
Белгилей кетсек 12-сентябрда Бишкек шаарынын Эски аянтында айт намазы окулуп, ага болжол менен 55 миңдей киши келгенин шаардык милиция билдирди. Бул күнү өлкө боюнча эс алуу күнү деп жарыяланган.
"Бишкек ШИИБдин Коомдук коопсуздук башкармалыгы тарабынан айт намаз учурунда тартипти сактоо боюнча план иштелип чыккан. Шаардык милиция ошондой эле айт намазга сайып-кесүүчү жана ок атуучу нерселерди алып келүүгө тыюу салынарын алдын ала эскерткен", — деп айтылат маалыматта.
Андан сырткары, намазга келгендердин коопсуздугун камсыздоо үчүн кайырчылар менен шек жараткан жарандар аянтка киргизилген эмес.
Айт намаз учурунда Бишкектеги коомдук тартипке төрт миңдей милиция кызматкери көз салган.
