"Пирамиданын" кызматкерин сабап, тоноп кеткендер милиционерлер экени айтылууда

© Sputnik / Рамиль Ситдиков / Медиабанкка өтүүДубинка кармаган кызматкерлер. Архив
Дубинка кармаган кызматкерлер. Архив - Sputnik Кыргызстан
Жазылуу
Ишемби күнү окуя боюнча аталган телеканалдын кызматкери милицияга арыз жазды.

БИШКЕК, 20-июн. — Sputnik. Бишкекте өткөн ишемби күнү "Пирамида" телеканалынын кызматкери Александр Забалуевдин таякталганы тууралуу маалымат каналдын Facebook тармагындагы баракчасында дүйшөмбү күнү жарыяланды.

Маалыматка ылайык, окуя "Гараж" түнкү клубунун жанында болгон. Эс алууга досу менен келген Забалуев байкоосуздан милиция кызматкерин жөөлөп кеткен.

"Кечирим суралганына карабастан милиционерлер аны клубдан чыгарып салышкан. Сырттан Октябрь ИИБдин кызматкерлери Забалуевдин үйгө кетүүсүн талап кылышкан. Буга макул болбогон кызматкерге милиционердин бирөө кол салып, натыйжада токмоктолгон Забалуевдин жанындагы алты миң сомун жана банк картасын алып алышкан", — деп айтылат билдирүүдө.

Телеканалдын кызматкери ошол эле күнү ооруканага жаткырылган.

"Пирамиданын" директору Нурзада Токтогулова Sputnik Кыргызстан агенттигинин кабарчысына Забалуев милицияга арыз менен кайрылганын белгиледи.

"Бул жумуш убактысынан тыш мезгилде болгон. Бирок бул милиция кызматкеринин мындай аракеттерин актабайт. Баары видеого түшүрүлгөн. Дарыгерлердин корутундусу бүгүн чыгат", — деди ал.

Кайгуул милициясы менен ШИИБ азырынча окуя боюнча эч нерсе дей элек.

Ал эми ИИМ башчысы Кашкар Жунушалиев буга чейин милиция кызматкерлеринин жай тургундарга сылык-сыпаа мамиле жасашы керектиги жөнүндө буйрук берген.

Жаңылыктар түрмөгү
0