Мектептин чатырын жабууда 1 млн. 248 миң сом өөнөгөндөргө кылмыш иши козголду

БИШКЕК, 18-апр. — Sputnik. Кемин районундагы Алмалуу айыл өкмөтүнүн кызматкерлери кызматтык абалынан кыянаттык менен пайдаланганы аныкталды деп билдирди УКМКнын маалымат кызматы.

Маалыматка караганда, Алмалуу айыл өкмөтүнө караштуу Кызыл-Суу айылында Өмүралиев атындагы орто мектептин чатырын оңдоодо мамлекетке 1 миллион 248 миң сом зыян келтирилген.

Тергөө учурунда аталган айыл өкмөтү мектептин чатырын оңдоо үчүн подрядчик менен 3 миллион 263,7 миң сом келишим түзгөн. Бирок, Эсеп палатасы текшерүү жүргүзүп, чатырды оңдоодо колдонгон курулуш материалдарынын сапаттык тастыктамасынын жоктугун жана дат баскандыгын аныктаган.

Жыйынтыгында мамлекетке 1 миллион 248,1 миң сом зыян келтирилгени тастыкталган.

Бул факты боюнча Алмалуу айыл өкмөтүнүн кызматкерлерине карата Кылмыш-жаза кодексинин 304- беренесинин ("Кызматтык абалынан кыянаттык менен пайдалануу") жана 306- беренесинин ("КРдин кызыкчылыктарына каршы контракт түзүү, мамлекеттик сатып алууну жүзөгө ашыруу") негизинде кылмыш ишин козгоду.

Учурда тергөө иштери жүрүп жатат.