Орловка шаарынын чет жакасында 45 койдун эмнеден кырылгандыгы аныктала элек

© Sputnik / Наталья Селиверстова / Медиабанкка өтүүКойлор. Архив
Койлор. Архив - Sputnik Кыргызстан
Жазылуу
Тийиштүү органдар мал оттогон аймактардагы суунун жана топурактын үлгүлөрүн лабораториялык анализ үчүн алышкан.

БИШКЕК, 19-янв. — Sputnik. Кемин районундагы Орловка шаарында 45 баш кой эмнеден ууланып өлгөнү аныктала электигин Кемин районунун агрардык өнүктүрүү башкармалыгынын жетекчиси Калыбек Мурсазаиров Sputnik Кыргызстан маалымат агенттигине билдирди.

Белгилей кетсек, январь айынын ортосунда фермер Хусейн Салпагаровго тиешелүү 45 кой кырылып калган. Ал малынын кырылып калганын эртең менен короосуна киргенде көргөн. Окуя болгонго чейин Салпагаров коюн иштебей калган Кемин химия-металлургиялык заводго жакын жерге жайган.

Мурсазаиров койлор эмнеден ууланганы тууралуу анализдер эртең 20-январда чыгарын кошумчалады.

"Учурда заводдун айланасына "мал жаюуга болбойт" деген атайын жазууларды илдик", — дейт ал.

Тез жардам автоунаасы. Архив - Sputnik Кыргызстан
Жалал-Абад облусунун Тогуз-Торо районунда тамактан эки киши ууланып каза болду
Мурсазаиров аталган заводго жакын жерде СССР маалында эле мал сарай болгондугун айтып, буга чейин заводго жакын жерге мал жайылып келгенин айтты. Ал ошондой эле, тузсураган мал жердин үстүңкү катмарына чыгып калган кислоталарды жалап, суу ичкенден кийин өлүп калышы мүмкүн деген божомол бар экенин кошумчалады.

Ал эми Орловка шаарынын мэри Жумгалбек Дүйшөбаев учурда лабораториялык анализдердин жыйынтыгы чыкпагандыктан тигил же бул жак күнөөлүү деп айтуу эрте экенин белгиледи.

Жайыт комитети тарабынан ар бир малчыга өз жайыт аймактары бөлүнүп берилгенин айткан Дүйшөбаев, малчылар дагы жоопкерчиликтүү болушу керек деген пикирде. Койлордун ээси Хусейн Салпагаровго жоготкон малынын ордун төлөп берүү же бербөө маселеси анализдердин жыйынтыгы чыккандан кийин караларын кошумчалады.

"Булардын бары, сот аркылуу чечилиши керек", — деди ал.

Шаар мэри сейрек кездешүүчү элементтер чыгуучу химия-металлургиялык завод 1991-жылдан кийин толук иштебей, учурда токтоп турганын айтты.

Жаңылыктар түрмөгү
0