БИШКЕК, 22-окт. — Sputnik. "Ала-Тоо" айылынан кармалган качкын кылмышкердин бири Эдил Абдырахмановдун жанынан оюнчук тапанча менен бирге "Ислам мамлекети" террористтик тобунун желеги табылган. Бул тууралуу ИИМ билдирди.
Алгач милицияга "Туңгуч" кичи районунда шектүү адамдын жүргөндүгү тууралуу маалымат келип түшкөн. Укук коргоо органдарынын кызматкерлери "Ала-Тоо" совхозуна чейинки аймагын курчоого алып, тинтүү жүргүзгөн.
Эдил Абдырахмановду "Ала-Тоо" совхозунун участкалык милиция кызматкери кармаган.
Кармалган жерден Абдырахмановго медициналык жардам көрсөтүлүп, аны милиция кызматкерлеринин кайтаруусу менен Чүй облустук ооруканасына алып кетишти.
Учурда түрмөдөн качып чыккан төрт кылмышкердин бири Алтынбек Итибаев гана эркиндикте калды. Ал эми түрмөгө кайтарылган беш кылмышкердин үчөө абактын ооруканасынан каза болду.
Милиция кызматкерлери акыркы кылмышкерди Сокулук районунун Жаңы-Жер айылынан издеп жатат.
