БИШКЕК, 29-авг. — Sputnik. Окумуштуу Майрам Юсупова кечээ, 28-августта 76 жашында дүйнөдөн кайтты. Бул туурасында анын жакындары билдирди.
Майрам Юсупова Кыргызстандын кадыр-барктуу инсандарынын бири. Ал Бишкек Гуманитардык университетинде япон тилинен сабак берип, кийинчерээк бир топ жыл Гапар Айтиев атындагы көркөм сүрөт музейинин директору болуп иштеген. "Мээрим" эл аралык кайрымдуулук фондунун жетекчисинин орун басары болгон. Бир нече илимий макалалардын автору, кыргыз-япон сөздүгүнүн түзүүчүсү.
Майрам Юсупова өткөн кылымдын жетимишинчи жылдарында Япониянын Саппоро шаарында СССРдин башкы консулуна чейинки жогорку кызматтарда иштеген, андан кийинки тажрыбасын Кыргызстандын өнүгүшүнө жумшаган, экс-мамлекеттик катчы Ишенбай Абдуразаковдун жубайы эле. Абдразаков былтыр 2014-жылдын 24-апрелинде 77 жашында дүйнөдөн кайткан.
