БИШКЕК, 15-июнь — Sputnik. Ош жана Жалал-Абад облустарында жекшемби күнү, 14-июнда болгон катуу шамал бир топ чыгым алып келгенин Өзгөчө кырдаалдар министрлигинин маалымат кызматы билдирди.
Катуу шамалдын кесепетинен 70ке жакын турак-жай чатырсыз калган. Маалыматка ылайык, Ош облусунун Алай районундагы Осоавиахим, Үч-Чат жана Миязды айылдарында катуу шамал катталып, 43 турак үйдүн чатырын учуруп кеткен. Ошондой эле Кара-Суу районундагы Сүрө-Таш айылында болгон шамал 20 турак-үйдүн чатырын алып кеткен.
Ал эми Жалал-Абад облусундагы Базар-Коргон районунда болгон катуу шамал Базар-Коргон айылындагы 3 турак үйдүн жана 1 сарайдын чатырынын шиферлерин учурган. Мындан сырткары, шамалдын кесепетинен 1 турак-үйдүн пескоблоктон урулган 40 метр дубалы кулаган.
Өзгөчө кырдаалдар министрлиги шамалдын ылдамдыгын тактап жатат.
