1988-жылы Бишкектеги Спорт ордосуна эл жыкжыйма болуп, бут коерго жер калган эмес. Көшөгө артындагы толкунданган жапжаш кыздар көп сыноодок өтмөк, эң татаалы – сахнага купальникчен чыгуу эле.

"Фрунзенин сулуусу" аталууга топ кыздар ат салышкан, алгачкы тандоого үч жүздүн тегерегиндеги катышуучу келген. "Фрунзе сулуусу – 88" сынагынын уюштуруучусу Гүлмира Бектемишева ал убакта сулуулук индустриясынын катаал мыйзамдарынан элдин эч кабары жоктугун эскерет.

Катышуучу кыздардын айтымында, андай сынактарга катышуу ошол мезгилде коом тарабынан катуу сынга алынып, сулуу деп табылган селкилер үй-бүлөсүнүн бетине көө жапкан адам катары каралган. "Агезде өзүн жакшынакай деп саноо уят катары кабылданчу" дейт экинчи орунду ээлеген Гүлнара Өмүркулова.

Мурдагы СССР өлкөлөрүнүн подиумдарында мода көрсөтүп жүргөн тажрыйбалуу манекенщицалардан тышкары кадимки кыздар да сынактын финалына чейин жеткен. Шоунун катышуучусу Татьяна Кучеренко ошол жапырт жетишсиз убакта эл алдына чыгуу үчүн кандай шартта даярданганын эскерди.

Сынак Спорт ордосунун сахнасында өткөн. Сүрөтчү Александр Федоров залдагы орун тургай, тепкичтерден бут коерго жер калбаганын эскерет.

Азыркы сынактардан "Фрунзе чүрөктөрүнүн" дагы бир маанилүү өзгөчөлүгү бар эле. Бүгүнкү күндө кыздар үчүн бардык тапшырмалар бир өңчөй: сахнаны бир нече ирет айланып басып, калыстардын жөнөкөй соболдоруна жооп беришет. Кээ-кээде гана сулуулар үчүн акыл таймашын уюштуруп же өз өнөрлөрүн көрсөтүүнү талап кылышат.

1988-жылы кыздардын тыш келбети башкы маселе эмес болчу, мисалы, катышуучулар кызыл чеке болуп мушташкан жигиттерди арачалап же гүлдөрдү топтоп гүлдесте жасоого тийиш эле. Иш-чаранын уюштуруучусу Гүлмира Бектемишованын эскерүүсүнө таянсак, ал тапшырмаларды ойлоп табуу үчүн узакка баш катырышкан.

Калыстар тобунун курамында ошол убактын бүт чыгармачыл интеллигенциясы - легендарлуу режиссер Геннадий Базаров, советтик кино жылдызы Гүлнара Чокубаева, белгилүү сүрөтчү-дизайнер Ибрагим Бакиров бар эле.

Жыйынтыгында үч жеңүүчү: үчүнчү орунга Элмира Кылычева, экинчиге Гүлнара Өмүркулова, ал эми Фрунзенин эң татынасы болуп Валерия Решетникова аныкталган.

Башка жеңүүчүлөрдүн дагы тагдыры белгилүү: Элмира Кылычева бир нече жыл мурун Италияга жер которгон, ал эми Гүлнара Өмүркулова бүт өмүрүн үй-бүлөсүнө арнап, төрт балалуу болгон. Ушул тапта Бишкекте турат.

"Көрүүчүлөрдүн купулуна толгон" татына Татьяна Кучеренко азыр Пензада жашайт. Аталган наамга татыгандыгы үчүн алган хрусталь графини азыр да өзүндө сакталуу.

"Фрунзе чүрөгүндөгү" чоң ийгиликтен кийин Кыргызстанда гана түгүл, бүтүндөй Борбордук Азия боюнча сулуулар сынагы биринин артынан бири өтө баштады. Азыр "Кыргызстан сулуусу" атыгуу үчүн жылына эки ирет ат салышышат, ар бир шаар, университет, ал тургай мектептер да өз чүрөктөрүн тандашат.

Бирок азыркылар баеолук жана ак ниеттүүлүк боюнча дал ошол алгачкы кыргызстандык сулуулук сынагына тең келе албайт, анда кыздар чачтарына жалтырак таштарды "Момент" клейи менен чаптап, кийимдерин жалтырак-жултурак менен өздөрү кооздошкон.