Жапаров Борбор Азияда транспорттук байланышты жакшыртуу боюнча сунуштарды айтты

© Sputnik / Георгий ЗимаревЖелезная дорога. Архивное фото
Железная дорога. Архивное фото - Sputnik Кыргызстан, 1920, 06.08.2021
Жазылуу
Садыр Жапаров Борбордук Азия аймагын дүйнөлүк сооданын маанилүү хабдарынын бирине айлантуу үчүн бардык өбөлгөлөр бар экенин белгиледи.

БИШКЕК, 6-авг. — Sputnik. Келечектеги "Кытай — Кыргызстан — Өзбекстан" темир жолу Евразия темир жол түйүнүнүн Борбор Азия тилкесиндеги маанилүү линияларынын бири болуп калат. Бул тууралуу президент Садыр Жапаров Түркмөнбашы шаарында Борбор Азия мамлекеттеринин башчыларынын консультативдик жолугушуусунда сүйлөп жатып айтты.

Өлкө башчынын маалымат кызматынан билдиришкендей, Жапаров Борбордук Азия аймагын дүйнөлүк сооданын маанилүү хабдарынын бирине айлантуу үчүн бардык өбөлгөлөр бар экенин белгиледи.

"Эл аралык автомобиль жана темир жолдорду кеңейтүү, логистикалык борборлорду жана транспорттук терминалдарды куруу регион үчүн приоритеттүү мааниге ээ. Ошондой эле унаа жолдору менен жүк ташууну өнүктүрүү, ташуу чыгымдарын кыскартуу аймак аркылуу өтүүчү транспорттук коридорлордун атаандаштыкка жөндөмдүүлүгүн жогорулатат. Кыргызстанда эл аралык стандарттарга туура келген транспорт инфраструктурасы активдүү өнүгүп жатат. Түндүк — Түштүк транзиттик унаа жолу курулууда", — деди Жапаров.

Буга байланыштуу Садыр Жапаров Кыргызстандын аймагы аркылуу өтүүчү Кытай, ЕАЭБ, ЕБ өлкөлөрүнүн ортосундагы транзиттик жүктөрдү Карачи жана Бандер-Аббас портторуна жеткирүүдө кыска убакытты жана арзан чыгымды камсыз кылууга жөндөмдүү болгон транзиттик коридорлорду белгиледи.

"Евразия темир жол инфраструктурасын куруунун жана модернизациялоонун зарылдыгын белгилөө керек. Кыргызстан бул инфраструктуранын бир бөлүгү болууга кызыкдар. Мындан сырткары, Борбор Азияда мультимодалдык транспорттук коридорлорду пайдалуу колдонуу үчүн суудагы жана жердеги транспорт ортосундагы функционалдык шайкештикти биргелешип иликтөөнү сунуштайбыз", — деди Жапаров.

 Кыргызстандын президенти Садыр Жапаров Борбор Азия мамлекет башчыларынын консультативдик жолугушуусу учурунда - Sputnik Кыргызстан, 1920, 06.08.2021
Жапаров Борбор Азия өлкөлөрүн биригип, кызматташтыкты чыңдоого чакырды
Президент соода тармагындагы кызматташтыкты активдештирүү максатында өкмөт башчылардын соода маселелери боюнча иш алпарган орун басарларынын деңгээлинде беш тараптуу өкмөттөр аралык комиссия түзүү маселесин карап чыгууну сунуштады.

Эске салсак, учурда президент Садыр Жапаров Түркмөнстанда Борбор Азия мамлекеттеринин башчыларынын консультативдик жолугушуусуна катышууда. Жолугушууда Борбор Азия өлкөлөрүнүн лидерлери соода-экономика, энергетика, транспорт жана коммуникация чөйрөлөрүндөгү региондук кызматташтык маселелерин, ошондой эле коронавирус пандемиясына каршы күрөшүүдө биргелешкен чараларды талкуулашат.

Жаңылыктар түрмөгү
0