Акча алмаштыруу жайларын жабуу мыйзамы боюнча Улуттук банк комментарий берди

© Sputnik / Эмиль СадыровДеятельность Нацбанка КР
Деятельность Нацбанка КР - Sputnik Кыргызстан
Жазылуу
Мыйзам долбоору Улуттук банк тарабынан демилгеленбегендиги, документти депутаттар иштеп чыкканы айтылат.

БИШКЕК, 17-апр. — Sputnik. Улуттук банк акча алмаштыруу жайларын жабууну демилгелеген Жогорку Кеңештин айрым депутаттарынын мыйзам долбоору боюнча комментарий берди.

Курс доллара - Sputnik Кыргызстан
Быйылкы жылдын алгачкы эки айында КРден канча акча чыкты. Рекорддук көрсөткүч
Белгилей кетсек, өлкөдөгү акча алмаштыруу жайларын жабууга багытталган мыйзам долбоору коомдук талкууга чыккан. Эл өкүлдөрү менчик бюролор операциялар тууралуу маалыматты жашырып, валюта курсун негизсиз жогорулатып, мындай аракети менен сомдун кунун кетирүүдө деген жүйө келтирген.

Sputnik Кыргызстан өлкөнүн башкы банкына кайрылып, бул демилге тууралуу пикирин сурады.

Улуттук банк тарабынан 2016-жылы алмаштыруу бюролору ишмердүүлүгү тууралуу күнүгө отчет бере турган автоматтык система иштелип чыккан. Бул система акча алмаштыруу жайларынын ишине көзөмөлдү жакшыртууга өбөлгө болгону айтылат. Мунун натыйжасында отчетунда коммерциялык банктар менен болгон операцияларын жашырып, толук маалымат бербеген фактылар аныкталган. Аларга карата мыйзам чегинде чара көрүлгөнү белгиленет.

“Валюта курсун коюу маселеси боюнча акча алмаштыруу бюролору валюта рыногунун башка катышуучулары сыяктуу эле сырткы жана ички факторлордун таасирине таянып чет элдик валютага суроо-талапты жаратат”, — деп жооп берди Улуттук банк.

Ошондой эле үстүбүздөгү жылдын биринчи кварталында 15 ирет текшерүү жүрүгүзүлгөнүн кабарлашты. Анын жыйынтыгы менен 50 жазуу түрүндөгү эскертүү, сегиз оозеки эскертүү берилген, 10 бюронун лицензиясы убактылуу токтотулуп, бирөөнө айып салынган.

“Бул мыйзам долбоору Улуттук банк тарабынан демилгеленген эмес. Аны Жогорку Кеңештин депутаттары иштеп чыккан. Улуттук банктын кароосуна келип түшө элек. Расмий түрдө жиберилгенден кийин мыйзамдын нормаларына ылайык корутунду чыгарылат”, — деп жазылат билдирүүдө.

Ошондой эле Улуттук банк 2015-жылы акча алмаштыруу жайларын жабуу боюнча мыйзам долбоорун иштеп чыкканын эске салды. Бирок коомдук талкуунун, министрлик жана ведомстволор менен макулдашуунун натыйжасында башкы көзөмөл банктын демилгеси колдоо таппай калганы белгиленди.

Мурдараак акча алмаштыруу жайларында иштегендер да пикирин билдиришкен. Алар аталган мыйзам долбоору негизсиз экенин айтып, коюлган айыптоолордун баарына жооп берген.

Жаңылыктар түрмөгү
0