БИШКЕК, 12-июн. — Sputnik. Казакстанда өтүп жаткан Астана ЭКСПО-2017 эл аралык көргөзмөсүндө Кыргызстан өзүнүн энергетикалык дараметин көргөздү. Бул тууралуу Өнөр жай, энергетика жана жер казынасын пайдалануу боюнча мамлекеттик комитетинен билдиришти.
Маалыматка ылайык, Кыргызстандын павильону Украина, Афганистан, Бангладеш жана Армения менен чогуу "Жибек Жолу" деген аталыш менен көрүүчүлөрдүн назарына сунушталган.
КР павильону 36 чарчы метр жерге жайгашып, бардык тематикалык маалыматтар сенсордук чоң экранда көрсөтүлгөн.
"Көргөзмөдө Кыргызстандын түгөнбөгөн гидроэнергетикалык дарамети жана кайра калыбына келген энергиянын булактары коюлган. 252 ири жана чакан дарыялардын гидроэнергетикалык кубаты 18,5 миллион киловатттан ашык деп бааланууда", — деп айтылат маалыматта.
Кыргызстандын "ЭКСПО-2017" эл аралык көргөзмөсүндө катышуусу үчүн бардык даярдык иштерин аталган комитет көргөн.
10-июнда ачылган көргөзмө үч ай бою иштеп, 10-сентябрда ишин аяктайт.
