БИШКЕК, 18-авг. — Sputnik. Чаткалдагы "Куру-Тегерек" кенинен 2017-жылдын аягында алтын жана жез казыла баштай турганын Тоо-кен металлургия кесиптик биримдиги билдирди.
Маалыматка ылайык, Жалал-Абад облусуна караштуу Чаткал районундагы "Куру-Тегерек" алтын жана жез кенин кытайлык "Кичи-Чаарат" ишканасы иликтеп келет.
"Учурда аталган кенди чалгындоо иштери жүрүп жатат. Учурда ишканада 400 жергиликтүү тургун жана 400 кытайлык жаран иштейт. Ал эми компания кенди казып алуу иштерин 2017-жылдын IV кварталында баштайт", — деп айтылат маалыматта.
"Куру-Тегерек" кенинде 98 тонна алтындын, 370 миң тонна жездин жана бир канча тонна күмүштүн запасы бар.
