Тоо-кендерине болгон инвестицияны 5 млрд.долларга жеткирүү каралууда

БИШКЕК, 15-янв. — Sputnik. Жыл сайын Кыргызстандын тоо-кен тармагына 2-2,5 миллиард сом салынып келген. Мындан ары өнүктүрүү стратегиясы инвестицияны беш миллиард долларга чейин жеткирүүнү көздөп жатат. Бул тууралуу Экономика министрлигинин маалымат кызматы билдирди.

Улуттук статистикалык комитеттин маалыматы боюнча пайдалуу кендер ИДПнын 0,9 пайызын түзөт. Тоо-кендерин иштетүү экономиканын өсүшүнө чоң салым кошооруна байланыштуу, өкмөт орчундуу көңүл бура баштаганы маалыматта белгиленет. 

Бүгүнкү күндө тоо-кен тармагын иштетүү активдүү фазага жете элек. Мындай көрүнүш инвестициянын жетиштүү деңгээлде келбей жатканына байланыштуу экенин Экономика министринин орун басары Туратбек Жунушалиев билдирген.

Инвесторлорду тоо-кен тармагына тартуу үчүн өкмөт 2015-2035-жылдар аралыгына өнүктүрүү планын түзгөн. Анын ичине инвесторлорго жер бөлүп берүүнү жеңилдетүү каралган. 

Мындан сырткары инвесторлорго уруксат кагазын алууда, юридикалык документтерди бүткөрүүдө жеңилдиктер бериле баштайт.