Быйыл былтыркыга салыштырмалуу чет элдик инвестиция 15%га көбөйгөн

Жазылуу
Сариев өкмөттүн алдында жергиликтүү компаниялардын сапаттуу товар өндүрүүсүнө шарт түзүү милдети турганын белгиледи.

БИШКЕК, 26-дек. — Sputnik. Быйыл жыл башынан бери өткөн жылга салыштырмалуу чет элдик инвестициянын көлөмү 15 пайызга көбөйүп, 642 миллион долларды түздү. Бул тууралуу премьер-министр Темир Сариев өкмөттүн облустардагы өкүлдөрү, райондук мамлекеттик администрация жетекчилери жана шаар мэрлеринин катышуусу менен өткөн жыйында билдирди.

Биржа кызматкери. Архив - Sputnik Кыргызстан
Экономика министрлиги: Кыргызстан сооданы интернет аркылуу өнүктүрүүгө белсенип жатат
Бул багытта Жалал-Абад облусу, Бишкек шаары жакшы көрсөткүчкө ээ болуп, начар көрсөткүч Талас облусуна туура келет. Бул облуста тикелей инвестициялардын түшүү көлөмү былтыркы жылдын 2 пайызын, ал эми Чүй облусунда 13 пайызды түздү.

Ал эми Ош шаарында быйылкы жылдын тогуз айында бир доллар да тикелей чет элдик инвестиция тартылбагынын Сариев сынга алды.

Премьер-министр ошондой эле облус губернаторлору жана район акимдеринин ишин баалоонун дагы бир көрсөткүчү аймактардан келген кат жана кайрылуулар болорун билдирди.

"Быйылкы жылдын 11 айында өкмөт аппаратына кайрылуулардын саны былтыркы жылга караганда 81 пайызга көп болгон. Мындан губернатор жана акимдер калк менен жолукпай, элдин үнүн укпаганынан кабар берет. Маселелер жеринде чечилбегендиктен жарандар өкмөткө кайрылууга аргасыз болууда", — деди Сариев.

Премьер-министр өкмөт алдында жаңы ишкана ачуу же токтоп калганды жандантып коюу гана эмес, атамекендик компаниялар атаандаштарга караганда сапаттуу жана жакшы товар өндүрүүсүнө шарт түзүү милдети да турганын белгиледи.

Жаңылыктар түрмөгү
0