Садыков: сууну сактап калуу үчүн электр энергиясын импорттоого мажбурбуз

© Sputnik / Шерстенников / Медиабанкка өтүүТоктогул суу сактагычы
Токтогул суу сактагычы - Sputnik Кыргызстан
Жазылуу
Электр энергиясын импорттоо менен суу сактагычтардагы сууну сактап калууга мүмкүнчүлүк түзүлүүдө дейт министрдин орун басары.

Электр энергиясынын тарифи эки айдан кийин өзгөрөт - Sputnik Кыргызстан
Элебаев: электр энергиясынын тарифи эки айдан кийин өзгөрөт
БИШКЕК, 26-мар. — Sputnik. Учурда Казакстандан күнүнө 3,5 — 4,5 миллион киловатт саат электр энергиясы келип жатат. Бул бизге өтө чоң жардам берип,  суу сактагычтагы суунун деңгээлин кармап калышыбызга бирден бир себеп болууда. Мындай пикирин энергетика жана өнөр-жай министринин орун басары Нурлан Садыков Sputnik сайтынын кабарчысына билдирди.

Садыков ушул тапта Тажикстандан да электр энергиясын алуу боюнча сүйлөшүүлөр жүрүп, баасы такталып жатканын кошумчалады. 

"Тажикстандан алына турган электр энергиясынын баасы жөнүндө азыр эч нерсе айта албайм. Себеби учурда сүйлөшүүлөр жүрүп, ар кандай сунуштар айтылууда. Булардын баарын карап чыккандан кийин келишим түзүлөт", — деди ал.

Былтыр Тажикстандан жай айында 200 миллион электр энергиясы алынып, аны менен Баткен, Ош облустарынын бир нече райондору жарык менен толук камсыздалган болчу.

Министрдин орун басары апрель, май айларында казак тарап менен жүргүзүлө турган накталай алмашуу аракеттеру боюнча буларды айтып берди. 

"Апрель, май айларында Казакстан бизге бекер электр энергиясын бериши керек,  канча электр энергиясын алсак, ошого жараша биз суу беребиз. Жөнөкөй тил менен айтканда, бартер болот. Алар бизге каражат төлөбөйт, биз да аларга каражат төлөбөйбүз. Биз апрель айында суунун деңгээлин көбөйтүш үчүн ГЭСти аз иштетебиз. Казакстан ошол убакта бизге электр энергия бериши керек", — деди ал.

Садыков былтыр Токтогул суу сактагычына болжонгон көлөмдүн 75 пайызы гана чогулганын айтып, суу 25 пайызга төмөн болуп калганын кыстыра кетти. Мындай абалдан чыгуунун бирден-бир жолу электр энергиясын импорттоо экендигин белгиледи.

Жаңылыктар түрмөгү
0