Ысык-көлдүн алмалары Россиянын рынокторун багындырат

Жазылуу
Ысык-Көлдүн дыйкан чарбаларынын продукциясы Россиянын Сибирь аймактарындагы дүкөндөрдө сатылууда, мындан ары көлдүктөр Москванын ири дүкөндөрүнө да өз өндүрүмдөрүн кенен жеткирүү ниетинде.

БИШКЕК, 19-мар — Sputnik. Ысык-Көл областынын багбандары өстүргөн алмалар Москванын дүкөндөрүндө пайда болду деп билдирди Sputnik сайтына биопродукцияларын өндүрүүчү "Ысык-Көл жемиштери" компаниясынын сатуу боюнча башкы менеджери Гүлжамал Адылова.

Анын айтымында, РФтин Сибирь аймагындагы сатып алуучулар Кыргызстандын продукциясы менен көптөн бери тааныш.

"Биз жыл сайын Новосибирскиге, Красноярскиге, Томскиге өзүбүздүн 600 тоннага чейинки продукциябызды жөнөтөбүз. Москванын базарларына жеткирүү башталышы менен биз экспорттуу жылына 1 миң 200 тоннага жеткирели деп жатабыз. Азыр москвалыктар биздин алманы ырахаттануу менен жеп көрүүдө, жана биз соода түйүндөрүнүн бири менен ири келишим түзөлү деп жатабыз", — дейт Адылова.

Азыр Россияда Европанын жемиштерин алып келүү олуттуу кыскаргандыктан, кыргызстандык өндүрүүчүлөрдүн бул рынокту ээлөөгө жакшы мүмкүнчүлүгү пайда болду деп белгиледи ал.

"Эң башкысы, биздин алмалар экологиялык жактан таза жана даамы-жыты башкача бир жагымдуу келет. Польшадан, Сербиядан келүүчү биз атаандаштык кылып жаткан алмалар мындайды керектөөчүлөргө сунуш кыла албайт. Рублдун түшүүсү менен биздин продукция да арзандап, сатуунун көлөмүнө жакшы таасирин берди", — деп айтты Адылова.

Мурда КРден барган алманын бир килограммы 50 рубль болчу, бирок ал азыр төмөндөп жана республика ЕАЭБга кошулгандан кийин мындан да арзан болот деген ишеничте менеджер.

"Биринчи кезекте товарга карата 18 пайыздык үстөк салык алып салынат. Бул да, албетте, жемиштердин баасына оң таасир кылмакчы. Ошондой эле биз ири сатып алуучулар менен түз иштеп, ортомчулардан арылалы деп жатабыз. Бул маселеде КРдин Экономика министрлигинин тышкы соода тамагындагы ыйгарымдуу өкүлү Улан Мамытов чоң жардам кылууда. Аталган министрлик кыргызстандык ишкерлер Россияда ийгиликтүү соода жүргүзө алат деген мамлекеттин кепилдигин берүүдө", — деп кошумчалады Адылова.

Ал башка секторлордогу да кесиптештери өз өндүрүмдөрүн Россиянын жана башка ЕАЭБ өлкөлөрүнүн рынокторуна чыгара башташы керектигин баса белгиледи.

Жаңылыктар түрмөгү
0