СССРдин эл артисти Сүймөнкүл Чокморовдун атчан сүрөтү 1967-жылы Суусамыр жайлоосунда тартылган.
Мухтар Ауэзовдун чыгармасынын негизинде жаралган тасмада Чокморов башкы каарман Бактыгулдун ролун жараткан.
Ошол кезеңди СССРдин эл артисти, кинорежиссер Болот Шамшиев мындайча эскерет.
"Сүймөнкул Чокморовдун ат минип алып суунун боюнда жышынып турган учурун 1967-жылы 23-ноябрда тартканбыз. Кышында Көкөмерен дарыясына атайын ошол эпизодун тартуу үчүн барганбыз, күн сууктап калган. Фильмдин тартуу иштери Суусамыр жайлоосунда, Казакстандын Жамбыл облусунда болгон. Жалпы тасманы төрт айдын ичинде бүтүрүп, кийинки жылы көрүүчүлөргө сунушталган", — деди режиссер.
Аталган фильмде Чокморовдон сырткары, Советбек Жумадылов, Муратбек Рыскулов, Бакирдин Алиев, Бакен Кыдыкеева, Эстебес Турсуналиев, Жамал Седакматова жана Сабира Күмүшалиева образ жараткан.
