БИШКЕК, 23-дек. — Sputnik. Бишкек шаарында 22-23-декабрь күндөрү Кыргызстандын режиссер кыз-келиндеринин II кинофоруму өтүүдө. Бул тууралуу "Азиянын чыгармачыл аялдары" коомдук фондунун жетекчиси Асел Жураева билдирди.
Форумдун алкагында Кыргызстан, Казакстан жана Өзбекстандын режиссерлору тарткан тасмалар көрсөтүлөт. Асел Жураеванын айтымында, форумга 50 тасма жиберилген.
"Алардын ичинен 19 тасманы тандап алдык. 16сы жергиликтүү фильм, экөө Казакстандан, бирөө өзбекстандык режиссердуку. Аталган эки өлкөнүн катышуусу менен кинофорум эл аралык деңгээлге чыкты десек болот", — деди Жураева.
Ал кинофорумдун максаты айым-режисселорду колдоо жана аларга чыгармачылык жактан жардам берүү менен бирге коомчулуктун көңүлүн өлкөдөгү гендердик көйгөйлөргө буруу жана аялдардын укугун кино аркылуу көрсөтүү экендигин белгиледи.
"Азиянын чыгармачыл айымдары" фонду тарабынан уюштурулган кинофорум ушуну менен экинчи жолу өтүп жатат.
