БИШКЕК, 11-ноя. — Sputnik. "Ата керээзи" тасмасы Барселонада өтүп жаткан Film Festival Barcelona деп аталган фестивалдын башкы сынагында ат салышып жатат. Бул тууралуу Sputnik Кыргызстан агенттигине фильмдин режиссеру Дастан Жапар уулу маалымдады.
Анын айтымында, кинофестиваль 2-ноябрда башталып, 12-ноябрга чейин уланат. Ал быйыл бешинчи жолу өткөрүлүүдө.
"Иш-чараны Испанияда Casa Asia эл аралык уюму уюштурду. Анда ар кандай тематикада алты секция бар. Алардын ичинен 18 тасма ат салышып жаткан "Панорама" секциясында Бакыт Мукул экөөбүз калыстар тобунун мүчөсү болуп дайындалганбыз. Ал эми фестивалдын өзүнө 100дөн ашуун фильм катышууда", — деди Дастан Жапар уулу.
Сценарийге ылайык, Америкада жашап жаткан Азат аттуу бала атасынын керээзи менен анын сөөгүн Кыргызстанга алып келет. Карыздарынан кутулуп, туугандары, достору менен жолугуп, жергиликтүү окуялардын күбөсү болот. Улам барган сайын Ата журттун топурагы кымбат экенин сезип, Америкага кетер-кетпесин билбей арсар ойго батат.
