БИШКЕК, 9-ноя. — Sputnik. Катардын Доха шаарына кыргыздын боз үйлөрү тигилди. Бул тууралуу Sputnik Кыргызстан агенттигине демилгени алып чыккан ишкананын директору Жылдызбек Музуратбеков билдирди.
Анын айтымында, калаадагы ири магистралдык жолдун боюна 10 боз үй тигүү пландалган. Учурда боз үйлөрдүн бешөө тигилип даяр болду, калганы Бишкектен жөнөтүлүүдө.
"Катарлыктар жыл сайын ушул маалда көлдүн жегиндеги салкын жайга барып чатырларын тигип, улуттук майрамдарын өткөрүшөт. Ар тараптан туристтер келип иш-чара үч-төрт айга созулат. Ал жерге тигилген боз үйлөрдүн ичине экран коюп Кыргызстан тууралуу роликтерди көрсөтөбүз. Максатыбыз — өлкөбүздү таанытып, туристтерди тартуу болуп саналат", — деди ал.
Ошондой эле ал иш-чарага араб өлкөлөрү гана катышып, чет жаткан бир гана Кыргызстан бара турганын белгилеп өттү.
Иш-чаранын расмий ачылышы 21-ноябрда болот.
