БИШКЕК, 31-окт. — Sputnik. Кинорежиссер жана Жогорку Кеңештин депутаты Садык Шер-Нияз тарабынан негизделип быйыл үчүнчү ирет өтүп жаткан Аsian World Film Festival (AWFF) кинофестивалына Голливуд жылдызы Анжелина Жоли келип катышты. Бул маалыматты Sputnik Кыргызстан агенттигине Шер-Нияз тастыктады.
Анын айтымында, фестиваль Лос-Анжелесте болгондуктан белгилүү инсандар көп эле келип жатат. Фестивалды көрүү үчүн Оскардын академиктери отурат. Кечки сеанстарга билет калбай калууда.
"Анжелина Жолинин Камбоджадан продюсер катары тарткан тасмасы биздин фестивалга катышып жатат. Мындан улам биз жана Азиядан келген режиссерлор менен таанышканы келиптир. Жарым сааттай баарлашып турдук. Аны кийинки жылы өтчү Көчмөндөр оюндарына, Кыргызстанга чакырдым. Анжелина Жоли ойлонуп көрө турганын айтты", — деди режиссер.
Аталган фестиваль 25-октябрда башталып, 2-ноябрга чейин уланат. Анын алкагында кыргызстандык режиссерлор Актан Арым Кубаттын "Кентавр", Эрнест Абдыжапаровдун "Саякбай", Таалайбек Кулмендеевдин "Мунабия" тасмалары көрсөтүлөт.
