БИШКЕК, 1-окт. — Sputnik. Кыргызстандык режиссерлор Түркияда өткөн "Түрк дүйнөсү" даректүү тасмалардын фестивалынан байгелүү кайтышты. Бул тууралуу аталган фестивалдагы калыстар тобунун мүчөсү Стамбулбек Мамбеталиев Sputnik Кыргызстан агенттигине билдирди.
Анын айтымында, сынак студенттер жана профессионалдар арасында эки категорияда өткөрүлгөн.
"Студенттер арасында Касиет Кубанычбекованын "Оймок" тасмасы биринчи, Айзада Алиеванын "Дербиш" фильми үчүнчү орунга жетишти. Ал эми профессионалдар категориясында Молдосейит Мамбетакуновдун "Аталардан калган сөз" тасмасы экинчи орунду багындырды", — деди Мамбеталиев.
Фестивалдын жеңүүчүлөрүнө сыйлыктарды тапшыруу аземи 30-сентябрь күнү Түркиянын борбору Стамбул шаарында өткөн.
Касиет Кубанычбекова менен Айзада Алиева Кыргыз-түрк "Манас" университетинин студенттери. Молдосейит Мамбетакунов да аталган окуу жайда мугалим болуп иштейт.
"Түрк дүйнөсү" даректүү тасмалардын фестивалы быйыл экинчи ирет өтүп жатат. Ага 23 мамлекеттин өкүлдөрү катышкан. Өткөн жылы ушул фестивалдан баш байгени "Көч" тасмасы менен Артыкпай Суйүндүков алган.
