БИШКЕК, 3-сен. — Sputnik. Кыргызстанга эквадордук атактуу музыкант, флейтачы Лео Рохас эл аралык фестивалдын алкагында, 4-6-сентябрда келет. Бул туурасында Маданият, маалымат жана туризм министрлигинен кабарлашты.
Бишкекте дүйнө элдеринин эпосторунун IV фестивалы өтөт.
"Иш-чаранын алкагында илимий-тажрыйбалык симпозиум өтүп, этнографиялык айылда жана бир нече жерде музыкант Лео Рохастын катышуусунда концерт болот", — деп айтылат таратылган маалыматта.
Пан-флейтачы Лео Рохас дүйнөгө Германияда болгон " Das Supertalent" деп аталган шоуда дүң болгон. Жалгыздап күү ойногон койчумандын ыргагында "Einsamer Hirte" композициясын аткарып, миллиондогон күйөрмандардын сүйүктүү музыкантына айланган. Бул чыгарма эл арасында орусча "одинокий пастух" деген ат менен тарап кеткен.
Эске сала кетсек, "Einsamer Hirte" чыгармасын алгач немец музыканты Жеймс Ласт аткарган.
Фестиваль улуу манасчы Сагымбай Орозбаковдун 150 жылдыгына жана "Ыйман, адеп жана маданият жылына" карата уюштурулууда.
