БИШКЕК, 24-авг. — Sputnik. Ысык-Көлдүн Тосор айылында үч күндүк Манас айтуу башталганын "Саякбай манасчы" эл аралык фондусу билдирди.
Маалыматка ылайык, иш-чара 23-август күнү саат 17.00дө башталып, Эр Жанек баатырдын 200 жылдык мааракесинин алкагында уюштурулууда.
"Иш-чара кыргыздын салтына ылайык бата жалгоо менен башталды. Манас айтууну КРдин эмгек сиңирген артисти, "Даңк" медалынын ээси Назаркул Сейдрахманов "Алмамбеттин келиши" менен ачып берди. Аны белгилүү манасчылар Кубанычбек Алмабеков, Камил Мамадалиев, Дөөлөт Сыдыков, Тилек Асанов, Өмүрбек Токтогулов, Асанаалы Калил уулу улантышты", — деп айтылат маалыматта.
Күнү-түнү тынбай Манас айтуу эртең, 25-август күнү жыйынтыкталмакчы.
