Атай: президенттен акча сурабадым, колдоп койсо кыргыз бийин дүйнөгө таанытмакмын

© Sputnik / Жоомарт УраимовИзвестный танцор Атай Омурзаков
Известный танцор Атай Омурзаков - Sputnik Кыргызстан
Жазылуу
Бийчи Атай Өмүрзаков этно бийлерин дүйнөгө алып чыгуу үчүн даярдаган долбоорун колдоп берүүсүн суранып президентке беш жолу кат жолдогон. Бирок андан жооп келбегенине нааразы болууда.

БИШКЕК, 6-июл. — Sputnik. Кыргызстан эле эмес, дүйнөгө таанымал бийчи Атай Өмүрзаков атайын долбоор менен чет өлкөгө чыгуу үчүн президент Алмазбек Атамбаевге кат жолдоп жооп ала албай келет. Бул маалыматты Sputnik Кыргызстан агенттигине бийчи өзү тастыктап берди.

Ал 1,5 жылдан бери президентке беш жолу кат жолдоп жооп албаганына нааразы болууда.

"Кыргыз маданияты дүйнөлүк деңгээлге чыкпаганы баарыбызга маалым. Биз кыргыздын этно бийлерин жаңы технологиялар менен заманбап стилде алып чыгууну пландаганбыз. Бул долбоор менен өлкө атынан Англия, Кытай, АКШ, Германия өңдүү мамлекеттерге бармакпыз. Президенттен каражат сурабадык, жөн гана чет өлкөгө чыгуубузга колдоосу керек болгон. Анын жардамы менен уюштуруу иштери жана уруксат алуу маселелери бир аз жеңилдемек", — деди Өмүрзаков.

Ошондой эле ал аталган долбоорду ишке ашыруу үчүн 350 миң доллар керектелерин жана ал каражатты өздөрү табарын айтты.

Instagram сайтынын atai_tumar.kr_adem аттуу колдонуучунун бетинен тартылган кадр. Атай Омурзаков. Архив - Sputnik Кыргызстан
Дүйнөнү дүңгүрөткөн Атай Өмүрзаковдун 10 ийгилиги
"Президентке эч кандай таарынычым жок. Ал бизди колдоп келген. Болгону мен жөнөткөн каттар ага жетпей калууда деген ойдомун. Бул жерде да бирөөнүн кызыкчылыгы барбы же кандай, түшүнө албай турам. Же "ооба" же "жок" деген жообун бербей 1,5 жыл күттүрдү. Акыркы катты ушул жылдын апрель айында жолдогом. Буга чейин уюштурган иш-чараларыма же чет өлкөгө баратканда бир да жолу мамлекеттен акча сурап кайрылган эмесмин. Баарын өзүбүз табууга аракет кылчубуз", — деди бийчи.

Өмүрзаковдун айтымында, 2010-жылы Россиянын "Минута славы" долбоорунун финалына өткөндөн кийин ошол кездеги президент Курманбек Бакиев кабыл алып эки бөлмөлүү батир берүүнү убадалаган. Бирок ортодо бийлик алмашуу болуп кетип Атайга делген турак жай ошол бойдон берилбей калган. Бул маселе боюнча ал эч жакка кайрылган эмес.

Ал эми президенттин маалымат кызматы Өмүрзаков жазган каттардын дарегине эмне үчүн жетпей калганын жакынкы күндөрү тактап берүүнү убадалады.

Кыргыздын сыймыктуу уулу, бийчи жана продюсер Атай Өмүрзаковдун маегин Sputnik Кыргызстан материалынан окуңуздар>>

Жаңылыктар түрмөгү
0