БИШКЕК, 17-апр. — Sputnik. КР Маданият, маалымат жана туризм министри Түгөлбай Казаков "Эң мыкты клуб" жана "Эң мыкты китепкана" наамына татыктуу болгондорду сыйлады. Бул тууралуу аталган министрликтин маалымат кызматы кабарлады.
Билдирүүгө ылайык, 15-апрелде Түгөлбай Казаков Ош шаарына иш сапары менен барып, Ош облустук китепканасынын залында 2016-жылдын жыйынтыгы боюнча "Эң мыкты клуб" жана "Эң мыкты китепкана" наамдарын тапшырган.
"Эң мыкты клуб" наамына Баткен облусунун Лейлек районунун Тогуз-Булак айыл өкмөтүндөгү Кара-Булак айылынын маданият үйү, Жалал-Абад облусунун Аксы районундагы Кашка-Суу айылынын маданият үйү жана Токтогул районундагы Саргата айылынын К.Жаманбаев атындагы маданият үйлөрү татыктуу болду.
Ал эми "Эң мыкты китепкана" Баткен районунун Бужум айылынын китепканасы, Жалал-Абад облустук китепкана жана Токтогул Сатылганов атындагы Ош облустук китепканаларына сыйлыктар тапшырылды.
Республикалык кароо-сынакка жалпысынан 704 клуб жана 1061 китепкана катышкан.
