БИШКЕК, 25-янв. — Sputnik. Англиялык драматург Уильям Шекспирдин "Глобус" театрынын режиссеру жана актрисасы Сара Жейн Бергер 20-21-мартта эки жумага Кыргызстанга келип, "Макбет" спектаклин коюу иштерин талкуулайт. Бул туурасында Токтоболот Абдымомунов атындагы Кыргыз улуттук академиялык драма театрынын адабий бөлүмүнүн жетекчиси Алтынай Темирова Sputnik Кыргызстан агенттигине айтып берди.
Ал аталган спектакль Кыргыз улуттук академиялык драма театрында коюларын айтты.
"Бир чети 21-мартта Ноорузду көрүп, театрыбыздын 90 жылдык юбилейине катышып, Кыргызстан менен таанышайын деген окшойт. Албетте, негизги максат — артисттер менен таанышып, "Макбеттеги" кайсы ролду кайсы актер ойнорун пландап, аныктоо. Ал эми күзүндө, буюрса репетиция башталат", — деди Темирова.
Ал"Макбетти" Кыргызстандын театр сахнасына алып чыгууда кеткен каражаттарды демилге көтөргөн тарап көтөрө турганын кошумчалады.
"Макбет" — Уильям Шекспирдин белгилүү трагедияларынын бири. Чыгарма Шотландия падышасы Макбеттин жашоосунан алып жазылган. Анда Шекспир бийликке жетүү үчүн адамдардын жан талашуусу, достордун сатып кетүүсү, адамзаттын утурумдук кызыкчылык үчүн пендечилиги чагылдырылган.
