БИШКЕК, 22-ноя. — Sputnik. Өспүрүм кыз тууралуу тартылган кыска метраждуу "Сейде" тасмасына Германияда өткөн Interfilm Film Festival сынагынын жыйынтыгы менен мыкты кинематография үчүн байге ыйгарылды. Бул тууралуу уюмдун расмий сайтында айтылат.
Фестиваль 14-20-нобярь күндөрү Берлин шаарында болду. Режиссер Элнура Осмоналиеванын "Сейдесинен" тышкары алты номинация боюнча сынакка катышуу үчүн 70 мамлекеттен 600 тасма арыз тапшырган.
Осмоналиева расмий баракчасында режиссер катары салтанаттуу иш-чарага катыша албай калганын айтып, байгени анын атынан Алтынай Мырзабекова алганын кошумчалады.
14 мүнөткө созулган кыска метраждуу тасма алыскы айылда жашаган Сейде аттуу кыз менен анын жакшы көргөн аты туурасындагы окуяны баяндайт.
"Сейде" тасмасынын дүйнөлүк премьерасы былтыркы жылдын сентябрь айында Венецияда өткөн эл аралык кинофестивалда тартууланган. Андан кийин АКШнын Санденс шаарында жана Франциянын Клермон-Ферране шаарында өткөн эл аралык фестивалда көрсөтүлгөн.
