БИШКЕК, 27-апр. — Sputnik. Азербайжанда Экинчи дүйнөлүк көчмөндөр оюндарынын ролиги тартууланганын КР Тышкы иштер министрлиги билдирди.
Кечээ, 26-апрель күнү Кыргызстандын маданият, маалымат жана туризм министри Алтынбек Максутов БУУнун Цивилизациялар альянсына мүчө мамлекеттердин Бакуда өтүп жаткан жетинчи форумунда Көчмөндөр оюндарын тартуулады. Иш-чарага 140 мамлекеттин делегациясы катышты.
Максутов Кыргызстан альянстын жаңы мүчөсү катары маданияттар жана диндер аралык диалогду өнүктүрүү боюнча бардык демилгелерди колдой турганын белгиледи. Форумдун алкагында министр альянстын өкүлү Насир Абд аль-Азиз аль-Нассер менен жолугушуп, Көчмөндөр оюндарынын эл аралык аренада жайылтуу маселесин талкуулады. Муну менен катар КР президентинин атынан аталган оюндарга катышууга чакыруу жолдоду.
Өз кезегинде альянстын өкүлү Кыргызстанды аталган уюмга кошулушу менен куттуктап, чакыруу үчүн ыраазычылык билдирди.
