БИШКЕК, 3-мар. — Sputnik. "Россия" телеканалы Дүйнөлүк көчмөндөр оюндарына көрүлүп жаткан даярдык тууралуу сюжет даярдап жатканын Улуттук спорттун түрү боюнча дирекциянын маалымат катчысы Нурпери Садырбекова билдирди.
Анын айтымында, Кыргызстандын улуттук спорту менен алектенген спортчулар 2-март күнү телеге тартылышты. Журналисттер көбүнесе салбурун, көк-бөрү сыяктуу улуттук оюндарга басым жасашкан.
Спорттун бул түрлөрү Дүйнөлүк көчмөндөр оюндарынын программасына киргизилгени маалым.
Программа ушул айда "Россия" телеканалынан тартууланып, журналисттер оюндарга карата жүрүп жаткан даярдык жөнүндө айтып беришет.
Өз кезегинде Улуттук спорттун түрлөрү боюнча дирекциянын башчысы Алмазбек Касенов телеканалдын тартуучу тобуна ыраазычылык билдирди.
Олимпиаданын аналогу болгон Көчмөндөр оюндары биринчи жолу 2014-жылы Ысык-Көлдүн жээгинде өтүп, ага Кыргызстан, Казакстан, Азербайжан, Белоруссия, Тажикстан, Өзбекстан жана Россиянын командалары катышкан.
Быйыл күзүндө II Дүйнөлүк көчмөндөр оюндары өтөт. Анын программасына улуттук спорттун 26 түрү киргизилген.
