Бүгүнкү "бурадар" спорт жана саясат тууралуу болмокчу. Ага чейин өлкө аймагына алынган аба ырайынан кабардар болуңуздар. И баса, синоптиктер дем алыш күндөрү күндүн көзү бузулуп, көпчүлүк аймактарда мезгил-мезгили менен жаан, тоолорго кар жаашы күтүлөт деп кулак кагууда.
Килем үстүндө сальто жасап, маңдайы жарыла сүйүнүп. Кечээ грек-рим күрөшү боюнча дагы бир балбандын жылдызы жанды. Ал Жаштар арасындагы дүйнө чемпионатында алтын тагынган Эрбол Бакиров. Финалда египеттик атаандашын кантип утуп алганын бул жерден көрүңүз. Өлкө намысына жараган уул экен деп сыймыктанып отурганыбызда ал Жогорку Кеңештин депутаты Максатбек Эгембердиевдин төртүнчү уулу экени белгилүү болду.
Ал эми Акжол Махмудов жеңишти колдон чыгарганы менен коло байгени атаандашына кармата койгон жок. Бирок бул беттеш да оңойго турбады. Ал былтыркы дүйнө чемпионатында жеңилип калган америкалык Камал Амир Бейди 8:1 эсеби менен багындырды. Андан өч алды десек да болот
Кыргыз футбол командасын гүлдөткөн машыктыруучу Александр Крестинин 40 жашка чыкты. Ал тууралуу 5 фактыны билип алыңыз.
Эми саясатка баш багалы. Парлементтин кечээки жыйыны Алмамбет Шыкмаматов менен Ирина Карамушкинанын кайым айтышуусу менен башталды.
Рыскелди Момбеков болсо Өнөр жай, энергетика жана жер казынасын пайдалануу мамлекеттик комитетинин төрагалыгына сунушталып жаткан Эмил Осмонбетов мурда кызматтан бошотулгандан кийин иш бөлмөсүндөгү телевизорду уурдап баратып, кароолчуга кармалып калганын уккан экен.
Ал арада Жогорку соттун судьялыгына көрсөтүлүп жаткан шаардык соттун судьясы Жаңыл Мамбеталы Садыр Жапаров эмнеге акталбаганын парламенттин жалпы жыйынында айтып берди.
Жакында эле УКМК Белиз мамлекетинен эч кандай траст документтер келбегенин билдирген болчу. Бирок Башкы прокурордун орун басары Нурлан Дүйшөмбиев Белизден келди деген документтерге УКМК купуя сыр белгисин койгондуктан толук маалымат бере албай турганын билдирди. Ошоо…
Ошондой эле абаката жаткан атка минерлердин да абалы кандай экени белгилүү болду.
Валюта наркы. Сомдун баасы долларга карата орто эсеп менен 68.66 (сатып алуу) жана 69.05 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 46.00 сом, АИ-92 үлгүсүндөгү май 43.50 сом, ал эми дизель майы 45.20 сомдон сатылууда.
Соңку сөз. "Байланган ит үрө берет, тиштей албайт" болбой алгылыктуу кадамдарды жасайлы!
Амандыгыңызды тилеп Эламан Карымшаков.
