Ошентсе да сактансаң сактайм дегендей сууга түшөр алдында жок дегенде жөпжөнөкөй коопсуздук чараларын билип алсак ашыктык кылбайт эле. Бул жерде сизге жана жакындарыңызга жардамы тийип калышы ыктымал болгон айрым эрежелерди тизмектеп койдук. Өз коопсуздугуңуз үчүн бир көз чаптырып карап коюңузчу.
Кырсык айттырбай келет дейт, качан, кайда эмне болуп кетерин алдын ала билбейбиз. Кечээ, 25-июлда Ысык-Көлдүн Кожояр айылындагы пансионаттын аймагындагы коттеджди тилсиз жоо толугу менен жалмап кетти.
Албетте коопсуздук бардыгынан жогору. Өзгөчө жарандардын коопсуздугу ар бир мамлекет үчүн маанилүү. Мына ошентип аңыз кепке айлана жаздаган "Коопсуз шаар" долбоорун ишке ашыруу үчүн тендер жарыяланып, Бишкек шаарынын кайсы жерлерине жол эрежесин бузгандарды аныктай турчу камералар коюлары да аныкталды. Эгер темир тулпарды туйлатып айдагандардын катарын толуктасаңыз, бул көчөлөрдүн кесилишине келгенде тизгинди тарта жүрүңүз.
Кыргызстан эмнеге бай, албетте суу ресурстарына. Бирок… бирок ошол байлыкты Кыргызстандын бардык тургундары пайдалана албай келет. Бул көйгөйдү чечүү үчүн таза сууга болгон бааны карап чыгып, ошондон түшкөн акчага суу жетпеген аймактарга суу тартылат экен. Бул маселенин күңгөй тескейине саресеп салдык. Сиз дагы пикириңизди билдириңиз.
Саясатты кантип жазбай коёбуз. "Райым миллион" кайтадан көңүл чордонунда. Өкмөттү сотко берген мурдагы бажычы оң жооп алды. Соттордун бул кылыгына экс-ажо Алмазбек Атамбаев өзүнүн кескин сынын айтты. Мурдагы президент андан өч алуу болуп жатканын айтып чыкты.
Валюта наркы. Сомдун баасы долларга карата орто эсеп менен 68.06 (сатып алуу) жана 68.25 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 46.60 сом, АИ-92 үлгүсүндөгү май 43.90 сом, ал эми дизель майы 44.80 сомдон сатылууда.
Соңку сөз. Сактыкта кордук жок дегендей, ар бир нерсенин алдын алууга аракет кылалы деп Расул Үсөналиев.
